Wanted person, boluntario a simmuko

SINAIT, Ilocos Sur – Boluntario a simmuko iti polis ti maysa a lalaki a sumangsango iti kaso iti maysa a korte sadiay Batac City idi malem ti Abril 14.

Simmuko kadagiti polis ni Jojie Igne y Icari, 25, naasawaan, residente iti Barangay Nagcullooban ditoy nga ili kalpasan a nangiyisio ni Judge Angelo M. Albano ti Regional Trial Court Branch 17, Batac City, Ilocos Norte iti warrant of arrest a napetsaan pay la idi Marso 12.

Sumangsango ni Igne iti kaso a robbery with frustrated homicide iti babaen ti Criminal Case No. 5023-17 iti sala ni Albano.

Nairekomenda ti P200,000.00 a piansa para iti temporario a wayawaya ni Igne.#