Wanted person iti regional, provincial level, naaresto

SAN JUAN, Ilocos Sur – Inaresto dagiti nagtitipon nga elemento ti kapolisan ti maysa a mekaniko a sumangsango iti kaso ti droga a nagpakni iti Barangay Lapting ditoy nga ili idi malem ti Agosto 11.

Kakuyog ti composite team manipud iti PIB Mt. Province, Bangued MPS, RIU 14, 1st MC RPSB, San Juan police station, Ilocos Sur Provincial Police Office ni Barangay Captain Ronnie Bringas ti Barangay Anggad, Bangued, Abra idi inarestoda ni Dominador Barilla @ Jerry Barilla, 36, mekaniko, idi agarup 3:30 ti malem ti nadakamat nga aldaw.

Iggem ti bunggoy ti warrant of arrest nga inyisio ni Judge Corpuz B. Alzate, presiding judge, RTC Branch 2, Bangued, Abra idi arestuenda ni Barilla gapu iti kasona a panaglabsing iti RA 9165 nga adda iti babaen ti Criminal Case No. 2016-109.

Numero 8 iti Regional Level Wanted Person Watchlist iti PROCOR ken No. 3 iti Provincial Level Wanted Person Watchlist iti Abra PPO ni Barilla ket awan ti nairekomenda a piansana.#