Wanted person, naaresto

STA. CRUZ, Ilocos Sur –  Inaresto dagiti polis ti maysa a mannalon gapu iti kasona iti maysa a korte iti Candon City idi agsapa ti Enero 8 sadiay Barangay Gabur Norte, ditoy nga ili.

Naaresto ni Ferdinand Abella y Jallorina, 37, baro, mannalon, ken residente iti Barangay Dili babaen ti warrant of arrest nga inyisio ni Judge Policarpio Martinez ti RTC Branch 71, Candon City a napetsaan iti Disiembre 12, 2012.

Sumangsango ni Abella iti kaso a homicide a nai-docket iti babaen ti CC No. 3125-C ket nairekomenda ti piansana a P200,000.00.

Addan iti kustodia dagiti polis ditoy ti akusado.#