VIGAN CITY – Naaresto ti maysa a lalaki nasurok a lima a tawen kalpasan nga imbilin ti hues ti pannakaarestona gapu iti sangsanguenna a kaso.
Inaresto dagiti polis ni Elmo Refuerzo y Ragunton, 40, naasawaan, ken residente iti Barangay Salindeg ditoy nga ili babaen ti warrant of arrest nga inyisio ni Judge Policarpio P. Martinez a napetsaan iti Agosto 3, 2009 mainaig iti kasona a panagrames a nai-docket babaen ti Criminal Case No. 6599-V.
Awan ti nairekomenda a piansa ni Refuerzo.
Nakalista ni Refuerzo a top number 8 most wanted persons iti Vigan City police station.
Naikustodia ti akusado iti police station ditoy kalpasan a naipababaen ti mediko legal nga eksamen iti Gabriela Silang General Hospital.#