Wanted person, natiliw kalpasan 15 tawen a panaglemmengna

STA. CRUZ, Ilocos Sur –  Kalpasan ti sangapulo ket lima a panaglemlemmengna, naaresto ti maysa nga akusado iti murder sadiay Sitio Pantar, Barangay Besalan, ditoy nga ili idi malem ti Hulio 9.

Inaresto dagiti polis-Sta. Cruz ni Francisco Carbonel y Sanchez, 50, naasawaan, mannalon ken residente iti nadakamat a barangay idi agarup 5:30 ti malem ti Hulio 9 babaen ti warrant of arrest nga inyisio ni Judge Gabino B. Balbin, Jr. ti RTC Branch 23, Candon City.

Indauluan ni Police Inspector Alejandro Manzano, Jr., Deputy COP, dagiti polis a nagturong iti Sitio Pantar, Barangay Besalan, tapno iserbida ti warrant of arrest ken ni Carbonel.

Sumangsango ni Carbonel iti kaso a murder ken frustrated murder a nai-docket iti babaen ti CC Nos. 1256-C ken 1257-D.

Awan ti nairekomenda a piansa ti akusado a nakakustodia itan iti police station ditoy.#