Warning device no adda kalamidad, naited barbarangay ti Caoayan

CAOAYAN, Ilocos Sur – Naikkan tunggal barangay ditoy nga ili iti ramit a pangballaag kadagiti residente no adda dumteng a kalamidad.

Ginatang ti lokal a gobierno ditoy nga ili nga idadauluan ni Mayor Germie Singson-Goulart  dagiti public address system a maaramat a pangballaag kadagiti umili no adda dumteng a bagyo, layus, ken dadduma pay a didigra.

Kinuna ni ABC President Teresa Alquiza a napagtitinonganda iti maysa a miting ti local disaster risk reduction and management council dagiti klase ti tunog ti sirena a pangpakdaar kadagiti umili tapno ammoda ti aramidenda ken isaganada no adda dumteng a didigra.

Kinunana a kas met laeng iti sound system a handy ti nagatang a public address system a mabalinda nga itaraytaray wenno ikabit iti de-motor a lugan sa agpasiar iti barangay a mangballaag kadagiti residente iti dumteng a didigra.#