Footer

Warning signs, maipasdek iti igid ti baybay ti Caoayan

CAOAYAN, Ilocos Sur – Tapno malapdan ti desgrasia kas iti pannakalmes, maipasdek dagiti karatula a mangballaag kadagiti sangsangaili ken turista a mapan agpipiknik wenno agdidigos iti kabaybayan ditoy nga ili.

Kinuna ni ABC President Teresa Alquiza a maysa a miting ti naangay a tinabunuan dagiti barangay kapitan, ti Philippine National Police ken Bureau of Fire Protection ket napagtitinongan ti pannakaipasdek dagiti warning signs iti igid ti baybay dagiti coastal barangays iti Caoayan tapno maballaagan dagiti bisita a mapan agdidigos kadagitoy a lugar.

Segun ken ni Alquiza, karaman kadagiti maipaskil a warning signs ti sumaganad: Avoid swimming on the months of May to September, Swim at your own risk, Danger!, ken dadduma pay a pangballaag kadagiti bisita nga adda panggepda nga agdigos iti kabaybayan.
Kinuna ni Alquiza nga adda dagiti panawen nga aggulpe nga umuneg ti baybay nangruna iti matutudo a mamagpeggad iti biag dagiti agdigos a di makaammo iti kasasaad ti baybay no awan dagiti warnings signs a maipasdek.#