Warrant of arrest, naiyisio kontra mangngagab

STA. CRUZ, Ilocos Sur – Babaen ti bileg ti warrant of arrest nga inyisio ti maysa a hues, inaresto ti polis ditoy nga ili ti maysa nga akusado a mangngagab idi malem ti Septiembre 5.

Imet dagiti polis ditoy ti warrant of arrest nga inyisio ni Judge Policarpio P. Martinez ti Regional Trial Court Branch 71, Candon City, idi napanda inaresto ni Elmer Bangkiad y Pacua, 48, naasawaan, ken residente iti Sitio Lingawa, Barangay Pidpid, ditoy met laeng nga ili.

Sumangsango ni Bangkiad iti panaglabsing iti P.D. No. 522 wenno Anti-Cattle Rustling Law ket nai-docket ti kasona iti babaen ti C.C. No. 3520-C ken nairekomenda nga agpiansa iti P36,000.00.

Naipan ti akusado iti Sta. Cruz police station para iti dokumentasion ken disposision.#