Water impounding project, makatulong iti padanum

CABUGAO, Ilocos Sur – Saanen a pagparikutan dagiti mannalon iti Barangay Pila ken Dardarat ti pannakapadanum ti talonda manipud idi naipasdek ti water impounding reservoir, daytoy ti naammuan manipud iti maysa nga opisial ti barangay ti Pila.

Segun iti nasao nga opisial, kabaelan ti water impounding reservoir a padanuman ti 15 ektaria a kataltalonan ti Barangay Pila ken Dardarat.

Sakbay a naipasdek ti nasao a proyekto, dakkel a problema dagiti mannalon ti nadakamat a dua a barangay ti pannakapadanum dagiti mulada agsipud ta awan ti pagpakunnotanda iti danum.

Nagbuligan  ti lokal a gobierno ditoy nga idadauluan ni Mayor Edgardo S. Cobangbang, Jr. ken ti Bureau of Soils and Water Management nga impasdek ti nasao a proyekto kas paset ti programa ti mayor a mangiprioridad iti pannakatulong dagiti mannalon ditoy nga ili para iti pannakaidur-as ti agrikultura ken idadakkel ti produksionda.#