Water lily: sumingsingising a pamastrekan

Nakananama ken makapaisem ti narangrang nga isisingising ti kabarbaro a panguartaan, ti water lily (water hyacinth). Adu dagiti water lily iti Caoayan (Ilocos Sur), a mangited iti dakkel a potensial nga agbalin nga industria ti handicrafts a kas iti pagnumnumaranen dagiti ili ken siudad nga immunan a timmapog itoy a panguartaan. Itandudona la ketdi ti nagan ti ili a Caoayan ken dagiti kadarappatna nga ili no di pay ket ti sibubukel a probinsia ti Ilocos Sur.

Ngem ti dakkel a saludsod, kasano? Ania dagiti nasken nga ammuen ti ili ti Caoayan itoy a banag?

Nalataken dagiti water lily handicrafts ti Malabon ken Taguig City iti Metro Manila; San Fernando, Pampanga; iti aglawlaw ti Lake Buhi, Buhi, Albay ken dadduma pay a luglugar a yan dagiti water lily.

Ngem ti ili ti Cuyapo, Nueva Ecija; Paniqui, Tarlac ken ti Siudad ti Las Piñas iti Metro Manila ti kapingetan iti produksion ti water lily handicrafts iti agdama ditoy pagilian ta agpipinnaaduda iti maaramid ken pinnintasan pay. Ti kompetision ti panaglakuan ket saan laengen nga iti lokal a merkado ta sinerrekda payen ti sangalubongan a merkado babaen ti inda panagiyeksport kadagiti partuatda iti Estados Unidos, Japan ken kadagiti merkado iti Europa.

Tapno ad-adda pay a mapapigsa ken mapabileg itoy nga industria ti handicrafts, tinawen a mangangay ti Cuyapo, Nueva Ecija ken Las Piñas iti parambak nga inawaganda iti Water Lily Festival. Inton bulan ti Hulio, iti petsa 27 a maangay ti Water Lily Festival sadiay Las Piñas. Idi met Abril 9-18 a naangay sadiay Cuyapo, Nueva Ecija. Sadiay met Paniqui, Tarlac, nangrugida laeng iti 25 a lumalaga, ngem ita, saanen a bumaba iti 50 a lumalaga, ken umad-adu dagiti mayat a sumrek itoy; banag a makatulong la unay a pamastrekan-panggedan dagiti lumugar.

Makaaring ken makaguyugoy unay ti panagaramid kadagiti produkto manipud iti water lily a mangited met iti naan-anay a bileg ken pigsa ti pakinakem dagiti agpangpanggep a tumapog itoy.

Kas iti ili ti Caoayan. Adu dagiti water lily ditoy. Imbes a dadaelen dagitoy a water lily ta baraanda ken serraanda ti agus ti danum, aramiden laengen a panguartaan dagitoy. Lalona la unay ti ungkayda (stalks).

Ti ungkay ti water lily ket nabaked la unay nga usaren a para kadagiti nagduduma a linaga.

Mapagango (sun dry) dagitoy ket isu iti lagaen a nagduduma a kita ti basket, sinelas, dagiti bag, wine holder, lamp shade, tissue holder, plate, flower basket, sandals, wallets, pouches, belts, trays, placemats, boxes ken dadduma pay.

Ngem kadagiti simreken iti export, saanda unayen a ituon iti imatangda ti sun drying ta nabuntog unay a proseso ken basbassit ti materiales iti maaramid a finished products; isu nga agus-usardan kadagiti dadakkel nga oven nga agpagango kadagiti ungkay tapno nadardaras ken ad-adu ti inda aramaten a materiales a lagaenda.

(Adda tuloyna)