Water system, manamnama a pagnaaran

MAGSINGAL, Ilocos Sur – Manamnama a pagnaaranton dagiti residente ditoy ti suplay ti danum manipud iti waterworks apaman a malpas ti spring box wenno deposito ti danum sadiay Barangay Barbarit ditoy nga ili.

Iti nadakamat a barangay ti nakabirokan ti Magsingal Water Works iti nabuslon a bagi ti ubbog a manamnama a supisiente a mangsuplay iti inumen kadagiti residente iti Poblacion barangays ditoy nga ili.

Kinuna ni Municipal Planning and Development Coordinator Tiburcio Tabarejo nga apaman a malpas ti deposito, maikonektar kadagiti tubo a kumamang iti kabalbalayan iti Poblacion barangays ditoy nga ili.

Napundoan ti nasao a water system babaen iti LUWA idi dadaulo pay ditoy ni dati a Diputado Prospero Pichay.#