Water transbasin, naidagadag

STO. DOMINGO, Ilocos Sur – Indagadag ti mayor ditoy nga ili ti pannakaipasdek iti pagurnongan ti danum tapno saan a malayus dagiti sumagmamano a lugar ditoy no panawen ti matutudo.

Tallo a barangay ditoy a pakaibilangan ti Nalasin, Pussuac ken San Pablo ti masansan a malayus no matutudo.

Maipalagip nga idi simmangbay ni Bagyo Mario, naibakuit ti agarup 400 nga agindeg ti nasao a tallo a barangay iti People’s Coliseum gapu iti pannakalayus ti lugarda.

Naidagadag ti pannakakali ti maysa a transbasin ti danum tapno ditoy ti pakaurnongan ti danum no panagtutudo imbes nga agturongda kadagiti nadakamat a barangay.

Kinuna ni Tadena a no adda water transbasin, maaramat pay dagiti mannalon ti maurnong a danum a pagsibog kadagiti mulada no nakidditen ti danum ti kalgaw.#