Waterworks, naibilin nga ingatona koleksionna

CABUGAO, Ilocos Sur – Gapu iti nababa a koleksionna iti makunsomo dagiti concessionaires a danum, imbilin ni Mayor Edgardo S. Cobangbang, Jr.  iti mangimaton iti Cabugao Waterworks ditoy a mangingato iti koleksionda tapno saan a mapadagsenan ti munisipio iti baybayadanna nga utang daytoy nga ahensia a pakaapektaran dagiti serbisio a maipaay kadagiti residente ditoy nga ili.

Naammuan a nakakolekta laeng ti Cabugao Waterworks iti P1,044,000.00 manipud Enero agingga iti Mayo daytoy a tawen, adayo a nababbaba nga amang iti targetna a kolektaren a P3.5 milion.

Mapapati a nakisang ti danum manipud iti ubbog ket nakiddit ti danum nga agayus kadagiti tubo a dumanon kadagiti kabalbalayan iti baet nga immutang ti administrasion ni dati a Mayor Suero para iti expansion program ti waterworks.

Tinawid ti administrasion ni Mayor Edgar S. Cobangbang, Jr. daytoy nga utang ti napalabas nga administrasion a mapapati a saan a naikkan iti naan-anay a feasibility study.#