Footer

“We Love You, Sir…” (Maikatlo a paset)

MAKUMIKOMEN dagiti dadduma a seksion nga agpraktis iti para iti mass demo iti maangay a Foundation Day ti pagadalan. Dagiti piesta iti pagilian ti tema ti mass demo. Rinugianen dagiti dua a titser ti MAPEH ti nagisuro kadagiti basic steps. Makaammonton ti adviser a mangaramid iti entrance, formation, blocking kada exit. Panunotenna payen no ania dagiti masapul a props. Ken bayabayenna dagiti ubbingna tunggal agpraktis dagitoy.

Tapno saan a madadael ti regular a klase, kinuna ti prinsipalmi a ti oras laeng dagiti subject a MAPEH, Values, TLE ken Computer ti mabalin a maaramat iti panagpraktis. Maipawil kadagiti major subjects.

Iti suronko iti 7-Moonstone, saanko a binibiangan ida kalpasan a naisuro kadakuada dagiti basic steps. Nakadlaw payen dagiti padak nga adviser.

“Adda klasek no kasta a praktisda, ma’am,” irasonko laeng. Sabagay, agpayso dayta. Masapul nga agklaseak. Major subjects met ti mairana a subject-ko no agpraktisda.

Iti dayta a malem ti Huebes, last canvassing para iti Mr. and Miss CWNHS. Sound system operator-ak. Nupay kaskasano, adda napatakderko nga agparis a kandidata iti kuartok– da Marco ken Coleen. Dakkel pay ti namnamak a mangabak ni Marco ta naayat ti pamiliana kadagiti kakastoy nga aktibidad. Kinapudnona, ni manangna ti nagreyna itay napalabas a tawen.

Sakbay a narugian ti programa, inasitgannak ni Helen, ti tesorera ti klase. Manarimaan nga i-test-ko ti mikropono.

“Apay?” insardengko ti ar-aramidek.

“Natakaw ‘diay quota-tayo, sir,” kinunana; makaluluasit.

Naklaatak. “Kaano pay?”

“Last period itay agsapa, sir,” kinunana. “Binilangko ngarud pay kalpasan ti break-mi.”

“Masiguradom dayta? Amangan no nalipatam laeng ti nangidissuam?”

“Saan, sir.”

“Nangidulinam kadi?”

“Iti bagko, sir. Imbatik iti kuartomi kalpasan ti maikatlo a period. Nagpa-computer room-kami para iti maudi a subject-mi. Notebook ken ballpen laeng ti intugotko. Imbatik ti bagko iti uneg ti kuarto. Idi agsublikami, awanen ‘diay quota.”

“Adda atapem a nangala?”

“Dagidiay bullakay a kaklasemi, sir,” saan man laeng a nagaripapa a nagkuna. Dagitay adda rekordna a panaginum, panagsugal ken panagsigarilio ti kayatna a sawen.

“Apay?”

“Ngannganida di napastrek iti computer room, sir. Kinse minuto a naladawda. Rasonda a napanda immisbo.”

Nupay kasta ti kinuna ni Helen, saanko a pinabasol a dagus dagiti atapenna apaman a napastrekko ida iti kuartomi.

“No asino man ti nangala kadakayo, class, pangngaasiyo ta isubliyo,” kinunak iti nababa a timek nupay madmadi ti riknak. “Pagaammotayo a di maikanatad dayta nga aramid. Maysa a basol. Siempre, ammok a mabainkayo a mangited ita. Iti iruruarko ditoy kuarto, mabalin a limed nga asitgandak tapno isubliyo. Ikarik, awanto ti pangibagbagaak iti kinaasinoyo.”

Nagkikinnitada laeng. Idi pinasikigak dagiti atapen ni Helen, nadlawak la unay ti pinagpipinnarimrimda. Saanko met ngarud a mabalin a karisaen ida. Adda man dakkel a kantidad a makitak kadakuada kas pangarigan, naglaka nga ibagada a balonda. Ngem dakkel ti atapko a nagastosdan. Naglabasen ti pangngaldaw. Wenno indulinda pay laeng. Wenno impaimada kadagiti babarkadada iti sabali a seksion?

Masuronak a nangpanaw kadakuada kalpasanna. Kinuna met ketdi ni Helen a naibaganan iti balayda itay nagawid isu nga umayto madamdama ni mamangna. Suktanna kano ti napukaw. Ti pakasuronak pay, namin-ano nga impalagipko dayta beinte a bayadan ti tunggal maysa ngem awan pay iti gudua dagiti nakabayad.

Sakbay a narugian ti programa, innala ni Ma’am Zianne, ti tesorerami a mannursuro, ti quota ti tunggal seksion. Siak ti awan naitedna. Imbagak a sumarsarunonton. Awan pagabunarko. Kalkalpas a nagsakit dagiti tallo nga ubbingko. Makalawas pay sakbay ti sueldo.

Intugawko iti sound system. Rinugianen ti emcee ti programa. Kalpasan ti pammasungad a sarita ti presidente ti PTA, ta adda napanan ti prinsipalmi, narugianen ti panagitinnag iti sobre. Nakitakon dagiti supporters dagiti kandidata a pakairamanan ni Coleen. Ngem awan pay a makitak ken ni Marco. Mangkellaat ngata, kinunkunak.

Ngem ngannganin agrikep ti karton a pagipisokan ti sobre, awan pay a nakitak ti nagannak ni Marco. Pagammuan, nakalbit ti likudak. Ni Aileen a manangen ni Marco.

Naragsakanak. “Ania, naitinnagyon dagiti sobre nga intedko nga usaren ni adingmo?” magagaranak a nagsaludsod.

Naglibbi a nagngilangil.

“Apay? Agrikepton ti urna!”

“Adda pay laeng iti pantalan idiay ili ni mama, sir. Saan pay a nakaballasiw.”

“Apay nga adda idiay? Dina kad’ ammo nga ita ti last canvassing?”

“Amman, sir. Ngem diak man ammo ta sinapada itay ti nagpaili. Addan sa kano mapanda iruar.”

Nagkuenta ti panunotko. Agarup tallopulo minuto ti panagballasiw iti sabangan. Sa agtraysikelto iti mapan a sangapulo a minuto. Awanen, uray adda idiay pantalan, saanen a makaabot. Madaman ti countdown ni Ma’am Tess.

Nalpay ti abagak idi naisardengen ti panagitinnag iti sobre. Ania pay, kas ninamnamak, pulos nga awan ti naitinnag para ken ni Marco. Yanna ngarud itan dagiti sobre?

Napangilangilak laengen.

“Kunak man no lumaban ni Marco nga anakmo, Sir P?” inamad ni Ma’am Ana idi addakamin iti office.

“Nairana kano nga adda naggastuanda, ma’am,” kinunak laengen. Ngem kinapudnona, masuronak! Sir P ti awagda kaniak ta nangrugi dayta iti angawda a karuprupak kano ni Piolo. Ania pay, pati ubbing, Sir P ti awagda kaniakon nupay Teody Farinas ti pudpudno a naganko.

(ADDA TULOYNA)