Website ti probinsia, naluktan

VIGAN CITY – Linuktan ti gobierno probinsial ti napabaro a websitena, ti  www.ilocossur.com.ph, tapno adda pakaammuan kadagiti napateg nga impormasion mainaig iti probinsia ken dagiti programa ken proyekto ti gobierno ditoy.

Kinuna ni Gov. Deogracias Victor “DV” Savellano a saan laeng a pakabigbigan ken pakaidayawan ti sibubukel a probinsia ti website ngem ketdi iti sangalubongan.

Kinuna ni Vice Gov. Jeremias “Jerry” Singson a babaen ti nasao a website, maammuan ti sangalubongan dagiti mapaspasamak iti Ilocos Sur ken aniaman nga inpormasion pakaseknan ti probinsia.

Segun iti bise gobernador, babaen ti nasao a website,   ditoy a makita dagiti proyekto dagiti opisial ti gobierno kangrunaan iti inprastraktura, agrikultura, edukasion, turismo ken dadduma pay.

Paset ti nasao a website ti Forum Site a siwawaya ti asinoman a bumisita ditoy a mangted iti komentario ken singasing  a  pagsayaatan ti probinsia.

Kiniddaw ni Savellano ti pannakitinnulong dagiti amin nga agserserbi iti lokal a gobierno babaen ti panangisubmiteda iti inpormasion a mabalin a maipablaak tapno agbalin a naprogreso ken agtultuloy ti napintas a buya ti  website ti probinsia.

Dimmar-ay iti launching dagiti information officers dagiti nadumaduma nga ili ken dagiti pangulo dagiti nadumaduma nga ahensia ti gobierno iti probinsia.

Maipalagip a nairusat ti website ti Ilocos Sur idi  2003 babaen met laeng ti initiatibo ni Savellano ket napabaro tapno agtultuloy ti pannakaipromot ti probinsia.#