Wen, Virginia, adda pay la milagro iti daytoy a panawen nga adun ti makalipat iti Dios

VIGAN CITY – Makabulan kalpasan ti pannakaselebrar ti Rambak Kristo Ari ditoy siudad, saan pay la a nagmawmaw ti damag a naglinnamano da Governor Ryan Singson ken ni Fr. Cosmenio Rosimo bayat ti misa a naangay iti Plaza Burgos idi Nobiembre 28.

Segun iti maysa a nakaimatang, idi nadanon ti paset a panangiyebkas dagiti nakimisa iti “peace be with you”, timmakder ni Fr. Rosimo ket immasideg iti yan ni Gov. Singson sana inyawat ti dakulapna.

Immisem met ti gobernador a nangiyawat iti dakulapna.

Segun iti maysa a saksi iti pasamak, maysa daytoy a ‘milagro’ a  pinataud ti kinasagrado ti misa ken iti pannakaselebrar ti Rambak Kristo Ari a maibilang a maysa kadagiti kangrunaan a pasken kadagiti napeklan a Katoliko.

Iti interbio kenkuana ti media, kinuna ni Singson a nagbalin dayta a darikmat nga espesial kenkuana gapu ta napan nakilamano kenkuana ni Fr. Rosimo.

Maipalagip a numero uno a kritiko dagiti ag-Singson, partikular ni Gov. Singson, ni Fr. Rosimo ket masansan nga ipangegna dagiti dillawna uray iti panagsermonna bayat ti panagmisana.

Iti kallabes, idinto nga  impasingked ni Singson a madadaan a makidialogo ken ni Fr. Rosimo iti aniaman nga aldaw ken sadinoman a tarigagayan ti kritikona a pakaangayanna, nagbalin a naikay ti padi aglalo kadagiti pasken a pakaawisanna a manamnama met a dar-ayan ti gobernador.

Madakamat ditoy ti pannakainagurar ti maysa a pasdek ti Central Ilocos Sur District Hospital a maysa kadagiti kangrunaan a sangaili ni Singson.

Ni Fr. Rosimo ti mangbendision koma iti pasdek ngem saan a nagparang iti nasao nga okasion iti baet ti pannakadismaya dagiti nangawis kenkuana a mangimaton iti ospital ken dagiti dadduma pay a naimbitaran.

Kabayatanna, ti met Parokia ti Suyo ti sumaruno nga agsangaili iti Rambak Kristo Ari inton umay a tawen.

Inwaragawag daytoy ni Arsobispo Ernesto Salgado, Jr. bayat ti tartaraudi a paset ti misa.

Agsisinnublat dagiti 32 nga ili ken 2 a siudad ditoy probinsia nga agsangaili iti Rambak Kristo Ari ket gapu iti dayta, agdagup iti nasurok a tallupulo a tawen santo manen masunotan ti Siudad ti Vigan ti agsangaili iti daytoy napateg nga okasion kadagiti Katoliko. Idi 1958 ti naudi a panagsangaili ti Vigan City iti Rambak Kristo Ari.

Ngem maikur-itto iti nabalitokan a pinanid ti historia ti Simbaan nga iti pannakaselebrar ti Rambak Kristo Ari iti Siudad ti Vigan, nagdinnakulap da Fr. Rosimo ken Gov. Singson, maysa a pagteng a  napasamak agsipud ta iti daytoy nga aldaw, nagari ti ayat ken kappia iti kaunggan ti tunggal parsua kas panagtamed ken ni Hesus, ti Ari dagiti ari.#