Footer

Wet market, mapalawa

CANDON CITY – Gimmatang ti gobierno ti siudad iti lote tapno mapalawa pay ti wet market ditoy.

Kinuna ni Odette de Guia, market consultant ti siudad, nga  agbalinton a 1.7 ektaria ti kalawa ti tiendaan publiko ti siudad no mabayadanda ti lote nga adda iti abagatan a paset ti agdama a wet market.

Kinuna ni de Guia a planoda ti pannakaipuesto ditoy dagiti aglaklako iti bagas, asin ken dadduma pay a tagilako, nalawlawa a pagparkingan dagiti lugan, ken pannakaipasdek ti kalsada a sumalpot iti abagatan a deppaar malaksid ti Darapidap road.

“Saanton a problema ti pagpuestoan dagiti aglaklako ta nalawanton ti wet market, nakuna ni de Guia.

Kinuna pay ni de Guia nga adda P15 milion a pondo manipud iti DILG para iti konstruksion ti baro a dua a kadsaaran a wet market.

Ngimmato iti 100% ti makolkolekta iti entrada iti nasao a tiendaan ta immabuten iti P600,000 iti binulan. (Danny Antalan)