Footer

White corn, inyendorso ni DV a maimula iti probinsia

SAN JUAN, Ilocos Sur –  Inyendorso ni Gov. Deogracias Victor “DV” Savellano ti pannakairaman ti white corn kadagiti imula dagiti mannalon ti Ilocos Sur kalpasan ti pannakiuman-umanna kadagiti opisial ti  Federated Farmers Association ken Municipal Agriculture and Fishery Council itay nabiit.

Segun ken ni Savellano, maysa daytoy nga addang tapno masupusopan ti panagkurang ti bagas gapuen ti agdama a krisis iti daytoy kangrunaan a taraon dagiti umili.

“Gapu ta ti white corn ti makitak a mabalin a mainayon iti bagas, masapul nga iyad-adutayo ti agmula iti daytoy tapno saantayo nga agbisin iti masanguanan,” kinuna ni Savellano.

Kinonsulta payen ti gobernador ni National Food Authority Provincial Manager Fortunato Bulao iti posible a pannakairaman ti white corn iti corn marketing assistance program a pagbinbinnuligan ita ti gobierno probinsial ken NFA. No matuloy ti nasao a gannuat, gatangenda dagiti white corn nga apit dagiti mannalon.

Nupay kasta, kinuna ti gobernador a saanto a mangted ti gobierno probinsial iti doleout projects kadagiti mannalon a masansan laeng a mab-abuso.

“Panawenen tapno masursuruan dagiti umili nga agsalukag, saan laeng a mangnamnama iti ited ti gobierno,” kinuna ti gobernador.

Malaksid iti white corn, indagadagna ti pannakapaadu ti produksion ti rootcrops kas iti kamote, kamoteng kahoy, tugi ken dadduma pay a makatulong tapno saan nga agbisin ti sangkaprobinsian sanguanan ti rice shortage a paspasaren ita ti pagilian.#