Latest News: Yuletide ceasefire ti gobierno Pilipinas ken NDFP opisialen a maipatungpal — Tawid News Magazine - Weekly Ilocos News 📰

Yuletide ceasefire ti gobierno Pilipinas ken NDFP opisialen a maipatungpal

VIGAN CITY — Opisialen a maipatungpal ti ceasefire kalpasan a naawat ti National Democratic Front of the Philippines (NDFP) ti kopia ti Suspension of Offensive Military Operations (SOMO) ken Suspension of Offensive Police Operations (SOPO) manipud iti gobierno ti Pilipinas.

Segun iti negotiating panel ti NDFP, naawatda ti kopia ti nasao a mandar manipud iti gobierno idi 8:54 ti agsapa (oras idiay Netherlands), Disiembre 26.

Ti SOMO ken SOPO ti katukad a sungbat ti administrasion iti immun-unan a deklarasion iti ceasefire ti Communist Party of the Philippines (CPP) idi Disiembre 22.

Ti reciprocal unilateral ceasefire ti CPP ket nangrugi idi 12:00 ti agsapa idi Disiembre 23 ken agpaut inggana 11:59 ti rabii ti Enero 7.

Maipalagip a nagdeklarar iti ceasefire ti CPP kas paset ti “confidence building measure” para iti posible a pannakaituloy iti peace talks ken panangbigbig iti tinawen a tradision ti umili a panangrambak iti Paskua ken Baro a Tawen.

“We thank Secretary Silvestre H. Bello III for sending to us the above-mentioned documents. We hope that from hereon, the unilateral and reciprocal ceasefires declared by the two parties shall proceed effectively,” kuna ti NDFP.

Iti immun-una a pablaak ti NDFP idi Disiembre 24, impalawag ni NDFP Panel Chairman Fidel Agcaoili nga agbalin laeng nga opisial ken epektibo ti deklarasion ti CPP a ceasefire no subalitan ti gobierno ti Pilipinas iti SOMO ken SOPO.

Ngem innayonna nga addaan karbengan dagiti yunit ti New People’s Army (NPA) a mangisayangkat iti aksion-militar kontra iti operasion dagiti pwersa ti gobierno kas paset ti aktibo a depensa.

Imbingayna daytoy kalpasan ti akusasion ti PNP ken AFP a naglabsing ti NPA iti ceasefire iti napasamak a rinnupak idiay Camarines Norte ken Iloilo idi Disiembre 23 bayat iti operasion ti AFP ken PNP kadagiti nasao a probinsia.

Kabayatanna, impalgak met ti Chadli Molintas Command (CMC) ti NPA iti rehion ti Ilocos ken Cordillera a suportaran ken istrikto nga ipatungpal dagiti mannakigubat ti New People’s Army, karaman dagiti kameng ti milisia ti umili ti ceasefire.

Impasigurado met ti tagapagsarita dagiti komunista a rebelde a saan a madangran ti asino man a kameng ti armado a pwersa ti gobierno “nga awan ti aniaman a naaramid a krimen laban iti umili ken rebolusionario a tignayan” a bumisita kadagiti lugar a paggargarawan ti NPA.

Innayon ni Montana a babaen iti ceasefire, maaddaan iti gundaway dagiti apektado iti kalamidad iti rehion ti Ilocos-Cordillera tapno makalung-aw. ●