Footer

Zaragoza, nabutosan a presidente ti League of Municipalities

VIGAN CITY – Ni Narvacan Mayor Edgardo Zaragoza ti kabarbaro a presidente iti League of Municipalities, Ilocos Sur Chapter kalpasan nga inatiwna ni Tagudin Mayor Roque Verzosa iti naangay nga eleksion iti session hall ti Sangguniang Panlalawigan ditoy itay lawasna.

Inatiw ni Zaragoza ni Verzosa babaen ti maysa laeng a butos.

Nakagun-od ti mayor ti Narvacan iti 15 a butos idinto a 14 a butos met ken ni Verzosa.

Duapulo ket siam a mamayor iti probinsia ti nagbutos babaen ti secret ballots iti panangpilida iti sumukat ken ni dati a Mayor ti Santa Jesus “Popoy” Bueno, Jr. a nagturposen iti maikatlo a terminona itay Hunio.

Iti panagkampaniada, inyarig ni Zaragoza ti panagbalubalda ken ni Verzosa a maysa laeng nga ay-ayam ta napateg ti panaggayyemda iti mayor ti Tagudin.

Innayon ni Zaragoza a siasinoman ti mapagasatan, sangsangkamaysadanto latta nga agtinnulong para iti pagsayaatan ti Liga.

Iti met biang ni  Verzosa, imbinsabinsana dagiti naaramidanna iti Tagudin, pammaneknek ti panagserbina a naimpusuan para iti ilina.

Dagiti sumaganad dagiti pinili ni Zaragoza a kaduana nga opisial: Executive Vice President iti 1st District- Cabugao Mayor Dio-Caesar Suero, Vice President, 2nd district –  Sta. Lucia Mayor Ferdinand Hernaez; Vice President, Upland – Salcedo Mayor Leonofre Gironella; Secretary  – Santa Mayor Jeremy Jesus “Jay-Jay”  Bueno III; Treasurer –  Magsingal Mayor Arlyn Favis; ken P.R.O – San Ildefonso Mayor Christian Purisima.

Dagiti walo a  board members: Tagudin Mayor Roque Verzosa, Jr., San Vicente Mayor Jose Tabanda III, Sto.Domingo Mayor Floro “Butch” Tadena, Burgos Mayor Nathaniel Escobar, Bantay Mayor Samuel Parilla, Sta. Catalina Mayor Carlos Asuncion, Mayor Onofre Bistoyong ken ni Mayor Guillermo Amoyen.

Imbatad pay ni Zaragoza kabayatan ti interview dagiti kameng ti media kenkuana nga aramidenna amin ti kabaelanna a mangidaulo iti Liga idinto a kiniddawna ti panagkaykaysa ti amin tapno balligi a maipatungpal dagiti plano ken proyekto ti gunglo. (Nemia Icari)