Footer

Zaragoza, sumango a presidente ti liga dagiti mamayor

NARVACAN, Ilocos Sur – Impakaammo ni Mayor Edgar Zaragoza iti Narvacan ti tarigagayna nga agkandidato para presidente ti liga dagiti mamayor ditoy probinsia.

Daytoy ti imbatad ni Zaragoza bayat ti eksklusibo nga interbio kenkuana ti DZTP Radio Tirad Pass ken ti Tawid News Magasin idi madamag kenkuana no panggepna ti tumaray a  presidente dagiti mamayor ditoy Ilocos Sur kas kasukat ni dati a mayor ti Santa Jesus “Popoy” Bueno, Jr.

Nagalus-os iti kinabise mayor ni Bueno iti napalabas nga eleksion agsipud ta naturposnan ti maikatlo a terminona kas mayor.

“Most probably!”  insungbat ni Zaragoza.

Kinuna ni Zaragoza nga iti pannakisarsaritana kadagiti padana a mayor, adu ti nangipeksa iti suportada kenkuana no agkandidato a para presidente ti liga.

Innayon ti mayor a nupay awan pay ti rimmuar a nagan a posible a sumango kenkuana, napimpintas nga ita pay laeng, addan a rummuar ti naganna nga agtarigagay a para presidente iti liga tapno makitana no sino ti lumaban kenkuana.

“Nasayaat nga ita pay laeng maammuandan a sumangoak tapno maammuak no sino dagiti interesado met iti daytoy a posision,” kinuna ni Zaragoza.

Agdagup iti 32 a mamayor ti kameng iti League of Mayors of the Philippines-Ilocos Sur ta kamengen iti Liga dagiti Siudad iti Filipinas ti Candon ken Vigan kalpasan a nagbalinda a siudad. #