Banner News: ‘Zero COVID–19 positive’ pay laeng ti Ilocos Sur – ISPHO | Tawid News Magazine - Weekly Ilocos News 📰

‘Zero COVID–19 positive’ pay laeng ti Ilocos Sur – ISPHO

VIGAN CITY — AWAN pay ti nagpositibo iti Corona Virus Disease (COVID–19) iti Ilocos Sur ta agpada a nagnegatibo iti test dagiti dua a Patient Under Monitoring ken Patient Under Investigation.

Dayta ti inrakurak ni Health Educator Benjamin Aguimbag a pannakabagi ti Ilocos Sur Provincial Health Office kabayatan ti inangay ti Philippine Information Agency ken Provincial Information Office a Serbisyo Publiko Media Forum iti Provincial Capitol idi bigat ti Pebrero 19, 2020.

Iti programa nga indauluan ni Ms. April Bravo ti PIA, inlawlawag ti Health Educator a “Zero COVID–19 positive” dagiti na-quarantine ken na-test a Patient Under Monitoring and Patient Under Investigation.

Impakaammona nga adda natalged ken isolated quarantine facility a pakaipanan iti 14 nga aldaw dagiti PUM wenno PUI tapno mapatalgedan ti posible a panagwaras ti COVID–19. Inlawlawagna a dagiti maala a sample specimen dagiti pasiente ket maipatulod sadiay Regional Health Office wenno sadiay Department of Health National Office para ti pannakaeksamenda.

Imbalakadna kadagiti umili a tapno malisian ti pannakaakar iti virus ket liklikanda ti mapan kadagiti matatao a lugar, papigsaenda ti resistensiada, regular a panagdaldalus, panagbuggo ken panangluto a nasayaat kadagiti taraon nga ipaunegda. Insingasingna pay ti umno a wagas ti panagaramat iti face mask a proteksion iti pannakaakar iti virus. Imbalakadna pay ti panangtungpalda kadagiti health advisory nga iyetnag ti DOH.

READ: Ilocos Sur creates inter-agency task force vs. COVID-19

Impakaammona pay ti nainget a pannakaipatungpal dagiti linaon ti Executive Order No. 23 nga impaulog idi Enero 28, 2020 ni Governor Ryan Luis Singson para iti intero nga Ilocos Sur tapno malapdan ti panagraira ti COVID–19.

Iti kaudian a report, dumanonen iti nasurok a 2,000 dagiti natay iti intero a lubong gapu iti COVID–19 a kaaduanna ket sadiay China a naggappuan ti virus. Nasurok metten a 75,000 dagiti naakaran iti virus iti intero a lubong. Iti Pilipinas, ket addan tallo a nagpositibo iti virus nga agpapada a foreign nationals ket maysan ti natay a maysa a Chinese National, nasurok metten a 400 dagiti PUM ken PUI iti pagilian.

Agtultuloy ti nainget a monitoring ti DOH ken dagiti maseknan nga ahensia tapno malapdan ti panagraira ti virus iti pagilian. ●

READ: Person Under Monitoring in Ilocos Sur, negative for 2019 nCoV