‘Ghostbuster’ a polis, 2 pay, pinadayawan ti PRO1

SAN FERNANDO CITY – Karaman kadagiti tallo a police officers a pinadayawan ti PNP regional office ditoy ti hepe ti polis ti Sta. Barbara, Pangasinan a nakatakuat ti kaadda dagiti “al-alia” a polis iti PNP.

Mismo a ni Police Chief Supt. Ramon Gatan, regional director ti Rehion I ti nangiyaspili ken ni Police Supt. Eric Noble, hepe ti polis ti Sta. Barbara, Pangasinan police station, ti Medalia ng Kasanayan itay Hulio 20 kas pammigbig ti opisinana ti nagapuanan daytoy.

Gapu ken ni Noble, natakuatan nga adda nasurok a sangagasut nga “al-alia” a polis nga agsusueldo ken umaw-awat iti benepisio uray naikkatdan iti serbisio, nakabalud ken nataydan ket nakainut ti PNP iti nasurok a P3 milion iti tunggal bulan iti pannakapunas dagitoy iti payroll.

Kabayatanna, naited met ti Medalya ng Kasanayan ken ni PO3 Arturo Melchor, Jr., Investigator ken Human Rights Affairs PNCO ti Pangasinan Police Provincial Office iti dayta met la nga okasion.

Napili ni Melchor gapu iti napintas a rekordna mainaig iti pannakakemmeg dagiti managdakdakes, ti panangisayangkatna iti Text 2920 a proyekto a nangiyasideg dagiti polis iti komunidad ken iti panangirusatna kadagiti espesial a programa para kadagiti agtutubo ken babbai.

Naited ti Medalya ng Katangi-tanging Asal ken ni SPO4 Virgilio Cardinoza ti San Carlos City Police Station gapu iti pannakapadayawna iti namindua a kas Most Outstanding Policeman ken pannakapilina a Most Outstanding Farmer of the Year iti 2007-2008 iti nasao met laeng a siudad.

Sakbayna, karaman da Noble ken Melchor kadagiti sangapulo a napadayawan a COPS 2009 iti seremonia a naangay iti Malakaniang idi Hulio 7, 2009.

Iti panangkablaawna kadakuada, indagadag ni Gatan kadagiti personnel iti panangtuladda iti nasayaat nga ehemplo dagiti tallo a police officers.

“Iladawan dagitoy pinadayawantayo ita ni Mamang Pulis. Agbalinda koma a role models iti yaaddangtayo iti puntiriatayo a napudpudno a panagbalbaliw iti Philippine National Police,” kinuna ni Gatan.#