1 natay, 5 nasugatan iti nagsisina nga aksidente

SAN ESTEBAN, Ilocos Sur – Maysa ti natay idinto nga innem ti nasugatan iti nagsisina nga aksidente a napasamak iti uppat nga ili iti segundo distrito itay nabiit.

Natay ni Reynante Espanto, 19, baro, residente iti Barangay Cappa-Cappa, San Esteban, Ilocos Sur idinto a nasugatan ni Dante Espanto, kalugaranna, gapu iti panangdungpar ti luganda iti kutit ti maysa a minibus.

Naammuan iti report a mapapati a kellaat a nagmenor ti minibus a minaneho ni Riczon Supnet, 35, residente iti Lanipao, Narvacan, Ilocos Sur gapu ta adda aglugan a pasahero ket saan a napakadaan dagiti biktima ket naidungpar ti motorsikloda iti kutit ti minibus.

Naideklara nga awanen ti biag ni Reynante a naidanon iti ospital.

Kabayatanna, dua ti nasugatan iti panagsinnapgid ti dua a motorsiklo iti Barangay Paras, Candon City.

Nasugatan da Jomar Galutan, residente iti Lussong, Bangar, La Union ken Roldan Quirobin, residente iti Oaig Daya, Candon City idi nagsinnapgid ti luganda iti kalsada a sakup ti nadakamat a barangay.

Naitaray dagiti dua iti Candon City Hospital ken Resonable Hospital.

Nayospital met da Efren Galleto Gomintong, residente iti Patungkalew, Quirino, Ilocos Sur ken Jocelyn Aquino, 39, residente iti Poblacion, Sta. Catalina, Ilocos Sur kalpasan a sinalapon ida ti maysa a motorsiklo a minaneho ti maysa a lalaki a mapapati a nabartek bayat ti pannagnada iti kalsada iti Barangay Pantar, Sta. Cruz, Ilocos Sur.

Naitaray dagiti dua a biktima agraman ti drayber ti motorsiklo iti ospital tapno maagasan ti sugatda.

Iti sabali a damag, nasugatan ni Ricsander Tesoro, 18, residente iti Candon City idi nasapgid ti motorsiklona ti maysa a kotse iti Barangay Bulbulala, Santiago, Ilocos Sur.

Iti inisial nga inbestigasion dagiti polis, mapapati nga innala ti motorsiklo ti linia ti Toyota Fortuner a minaneho ni Melborne Macumi, 32, residente iti Sanchez Mira, Cagayan ket nupay pinadas ti drayber ti lumiklik, nagsinnapgid latta dagiti dua a lugan.#