Footer

10 construction workers, natiliw gapu iti illegal fishing

SALCEDO, Ilocos Sur – Ballaag iti publiko: maiparit ti agkalap iti Buaya River a masarakan iti Sitio Bago, Barangay Bulala-Leguey, ditoy nga ili agingga inton Oktubre 2017.

Mapapati a saan nga ammo dagiti sangapulo a construction workers ti kaadda daytoy nga ordinansa ket napanda nagpana iti lames iti nadakamat a lugar idi aldaw ti Enero 16. Resulta: natiliw dagitoy sada napagmulta.

Nabigbig dagiti natiliw a construction workers a da Leo Cawaing, 45, foreman, manipud iti Quirino Hill, Baguio City; Marcelo Aluyen, 56, ken Joshua Gallo, 23, agpada a taga-Banuen, Quirino, Ilocos Sur; Raymund Virocel, 40, ken Juancho Virocel, 22, agpada a taga-Candon City; Greg Pablo, 24; Michael Gomez, 22; Nazer Gomez, 21; Wishley Gabuyo, 23, ken Archie Maningo, 25, agpapada a taga-Abra.

Kas maibatay iti report manipud iti police station ditoy, idi agarup 11:00 ti aldaw ti Enero 16, nakaawatda iti impormasion nga adda grupo dagiti lalaki nga agiwaywayat iti illegal a panagkalap iti Buaya River.

Nagturong dagiti polis iti nadakamat a lugar ket nadatnganda dagiti suspek nga agpampana iti ikan a panagsalungasing iti Municipal Ordinance No. 003-2016 a mangiparit iti panagkalap iti aniaman a wagas iti Buaya River manipud Bulala (Kinibor) agingga iti Sitio Cabaroan (San Tiburcio) iti las-ud ti makatawen manipud Oktubre 2016 agingga iti Oktubre 2017.

Naipan dagiti suspek agraman dagiti napanaanda nga ikan iti police station para iti dokumentasion ken disposision.

Napaggawid met laeng dagiti suspek kalpasan a nagbayadda iti multada a tig-P500.00. (Tawid News Team)