1,200 school bags, naiwaras kadagiti Grade I pupils

CANDON CITY – Nasurok a sangaribu nga school bags ti inwaras ti city government ditoy kadagiti Grade 1 pupils kadagiti pagadalan publiko ditoy siudad.

Agdagup amin iti 1,219 nga school bags ti inwaras da Mayor Allen Singson ken dagiti city officials manipud Hulio 21 agingga iti Hulio 30 kadagiti Grade I pupils kadagiti nadumaduma a public schools ditoy siudad.

“Inyussuatmi daytoy tapno rumegta dagiti ubbing iti panagbasada ken matulongan dagiti nagannak iti panangipaayda iti edukasion kadagiti annakda,” kinuna ni Singson iti interbio ti media kenkuana.

Uray kadagiti napalabas a tawen ket nagiwaras ni Mayor Singson iti school bags ken supplies kadagiti Grade I pupils iti amin a publiko a pagadalan iti Candon City.

Kabayatanna, nakurang a sangagasut nga school bags ken supplies ti naiwaras kadagiti agbasbasa iti Boguibog ken Kinmarin Salcedo, Ilocos Sur itay Hulio 22.

Mismo a simmang-at ti nagtitipon a grupo ti DZTP Radio Tirad Pass nga indauluan ni station manager Arlon Serdenia, Citizens’ Involvement and Services, Sta. Lucia-Sta. Cruz Riders Club ken ti grupo ni Engr. John Garcia tapno iwarasda dagiti bag ken supplies kadagiti nadakamat a barangay.

Winarasan ti grupo dagiti amin a Grade I ken Day Care pupils iti Baguibog Elementary School iti school bags ken supplies a nagtaud ken ni Gov. Deogracias Victor Savellano.

Nagturong kalpasanna ti grupo iti Kinmarin Primary School a sakup ti sitio Kincoop ket ditoy, winarasanda dagiti agbasbasa iti Day Care agingga iti Grade 4 iti school bags ken supplies.

Naited pay ditoy a barangay ti dua a karton nga ag-agas, luplupot, kalendario ken dadduma pay.

Ti Kinmarin, Kincoop ken Boguibog dagiti kalenglengan a lugar iti Ilocos Sur.#