VIGAN CITY – Agdagup iti 12,000 a liblibro ken reading materials nga agpateg iti P7 milion ti naiwaras kadagiti nadumaduma a pagadalan iti umuna a distrito ti probinsia babaen ti Books for Asia a programa ti Asia Foundation itay Abril 16 ditoy.
Kalpasan iti simple a turn-over program a naangay iti Baluarte ditoy siudad, naiwaras a dagus dagiti liblibro ken reading materials kadagiti school officials ken teachers dagiti nadumaduma a pagadalan a benepisario iti Books for Asia a programa ti Asia Foundation.
Kanaig daytoy, indagadag ni Congressman Ronald Singson nga ipabasa dagiti mangisursuro dagiti naiwaras a liblibro kadagiti estudiante idinto nga inyarigna dagitoy iti maysa a bukel a no saan a maimula, awan ti pagserbianna ta matay met laeng ngem no maitukit, agrangpaya ken agbunga nga aramaten a ramit dagiti agbasbasa iti isasangoda iti “narusanger a realidad” ti biag.
Impalgak ni Singson a maysa nga staff ti opisinana ti nakaduktal iti daytoy a programa ti Asia Foundation ket nakikammayyet ken ni Director Efren Balajadia ti Books for Asia para iti panagbalin a benepisario dagiti pagadalan iti umuna a distrito ti probinsia.
Kinuna met ni Balajadia a saanda nga umas-asideg kadagiti politiko agsipud ta kayatda a liklikan ti pannakaaramat ti programada iti libro para iti politika ngem immannugot nga iti babaen ti opisina ni Singson a maiwaras dagiti liblibro kalpasan nga impatalged ti diputado nga ibaklay ti opisinana ti mabusbos iti pannakaibiahe dagiti liblibro ken iti madagdagus a pannakaiwaras dagitoy kadagiti resipiente a pagadalan.
Kinuna pay ni Balajadia a kaykayatna a madadael dagiti inwarasda a liblibro gapu iti pannakaaramatda ngem iti maikabilda iti naka-padlock nga estante a bubuoten ken an-anayen laeng.
Presente iti pannakaiwaras dagiti liblibro da Gov. Deogracias Victor Savellano ken dagiti school officials ken mangisursuro iti umuna a distrito ti probinsia.
Manipud rinugian ti Asia Foundation daytoy a proyektona idi Septiembre 1954, addan 15 a pagilian ti nagbalin a resipiente dagiti naiwaras a libro a mapattapatta nga umaboten iti 40 milion.
Agdagup metten iti 13 milion dagiti liblibro ken journals a naiwaras kadagiti nadumaduma a pagadalan ditoy pagilian a kaadduan dagiti adda iti Kamindanaoan.
Impatalged ni Balajadia nga addanto pay sumarsaruno a maiwaras a liblibro para iti umuna a distrito ti probinsia no makitada a nasayaat ti pannakaaramat dagitoy kadagiti resipiente a pagadalan.#