1500 indigents, immawat iti Philhealth cards

STA. CATALINA, Ilocos Sur -Umabot iti 1,500 nga indigent a residente manipud iti siam a barangay daytoy nga ili ti immawat iti PhilHealth cards idi nabiit.

Iti panagsarita ni Mayor Carlos Asuncion bayat ti pannakaiwaras ti Family Health Card a naangay ditoy idi Abril 16, kinunana a napili a nasayaat dagiti immawat tapno masigurado a dagiti talaga nga agkasapulan ti pakaitedan daytoy a serbisio.

“Adda pay aganay 400 nga indigents ti sumaruno a mawarasan apaman a maiyenrolda iti Philhealth,” impakaammo ti mayor.

Napaadda dagitoy a Philhealth cards babaen ti tripartite counterparting scheme ti nasional a gobierno, ti gobierno probinsial ti opisina ni Cong. Ronald Singson ken ti local government unit nga idauluan ni Asuncion.

Kinuna met ni Gov. Deogracias Victor “DV” Savellano a napanunot ti gobierno probinsial ti sumrek iti tripartite counterparting scheme tapno umadu dagiti kaprobinsiaan a mabenepisiaran iti babaen ti Philhealth program.

Nupay kasta, inggunamgunamn ti gobernador ti panagan-annad dagiti umili tapno saanda a kapten ti sakit.

“Ti panangprebentar pay laeng ti kangrunaan tapno masalaknibantayo manipud iti sakit,” kinuna ti gobernador.

Innayonna pay a kasapulan ti panagsubli iti herbal plants kas agas tapno maksayan iti gastos iti nangina nga agas iti botika.#