19 a barangay iti 6 ili, nawarasan iti food commodities

VIGAN CITY – Sangapulo ket siam a barangay manipud iti innem nga ili ditoy probinsia ti nawarasan itay nabiit kadagiti food commodities ken material para iti early childhood care and development.

Kinuna ni Provincial Social Welfare Development Officer Ferdinand Concepcion a karaman kadagiti nawarasan kadagiti food commodities ken material dagiti ili ti Alilem, Cervantes, Tagudin, Sta. Lucia, Cabugao ken Sinait.

Kinuna ni Concepcion a naiyawat kadagiti municipal social welfare and development officers, barangay captains, barangay nutrition scholars, barangay health workers ken Day Care workers manipud kadagiti nainaganan nga ili dagiti food commodities para iti supplemental feeding, weighing scales, nutrition flip charts, bitamina, ag-agas ken liblibro a pakairamanan ti reading, writing ken math books.

Innayon pay ni Concepcion a joint project daytoy ti gobierno probinsial ken Council for the Welfare of Children, maysa a national agency. Pitopulo a porsiento ti imbaklay ti CWC idinto a 30% ti nagbalin a counterpart ti gobierno probinsial.

Mabenepisiaran ditoy dagiti ubbing nga agtawen iti 0-6, segun ken ni Concepcion.

Kinuna met ni Pug-os, Cabugao, Barangay Captain Arnold Yangat, apagisu ti pannakaiyawat dagiti ECCD materials iti barangayna ta madama ti supplemental feeding nga isaysayangkatda.

Ad-adun ti maipaaymi kadagiti ubbing iti idadateng dagitoy ECCD materials,” impalgak ni Yangat.

Naitudo metten ti kapitan dagiti recipients dagitoy nga inawatda.#