1st District, agmalmalem nga awan ti koriente inton Mayo 26

VIGAN CITY – Awan ti koriente iti sapasap nga umuna a distrito ti Ilocos Sur inton Mayo 26, daytoy ti inwaraga-wag ti Ilocos Sur Electric Cooperative.

Segun iti ISECO, agawan ti koriente manipud iti 6:00 a.m. agingga iti 6:00 p.m. ta adda trabahuen ti National Grid Corporation of the Philippines.

Daytoy ti maikapat a panaga-wan ti koriente iti umuna a distrito ti probinsia gapu iti panagtrabaho ti NGCP iti sub-station.

Nagawan ti koriente iti umuna a distrito iti 17 nga oras idi Pebrero 7, 14 nga oras idi Marso 14, ken 14 nga oras idi Mayo 7.

Panggep idi ti NGCP ti agtarimaan iti substation iti Bantay iti uppat nga aldaw ngem sinupiat ni Cong. Ronaldo Singson agsipud ta maapektaran unay dagiti negosio ken agtagtagibalay.#