2 drug surrenderees, natiliw bayat ti pot session

SANTIAGO, Ilocos Sur – Simmuko dagitoy dua a drug personalities iti napalabas ket inkarida ti suportada iti war on drugs ni Presidente Rodrigo Duterte ngem agparparang a pammarang la gayam ta dida met iniddian ti dakes a bisioda.

Ngem malasda ta agtultuloy ti panangsiput kadakuada ti kapolisan ditoy nga ili ket saanda a nakalasat iti panaggammat kadakuada ti ima ti linteg bayat ti pot sessionda iti maiparparit a droga iti uneg ti maysa a balay sadiay Barangay Mambug, ditoy nga ili idi malem ti Enero 4.

Naipiskot dagiti polis bayat ti mapapati a panagsul-oyda iti shabu da Reynaldo Bajet y Aranda, 52, naasawaan, mannalon, residente iti Barangay Mambug, ken maysa a Joseph Cuaresma y Andres, 29, baro, ken residente iti Barangay Olo-olo Sur ditoy met laeng nga ili, iti uneg ti balay ni Magdalena Pimentel y Bajet, 54, balo.

Segun iti polis, agpada dagiti suspek a drug surrenderrer ken karaman iti drug watch list ti Santiago police station.

Nakakumpiska dagiti polis iti ikut dagiti suspek iti tallo a babassit a heat sealed plastic sachet a nagkarga iti mapapati a shabu; 2 a kuppil a lighter; 3 a narolio ken nakunes nga aluminium foil a nagkarga iti mapapati a shabu residue; maysa a paris ti getteng; maysa nga stick a maaramat a para repacking iti shabu; maysa a Samsung cellular phone; P500.00; pusporo ken dua a pouch.

Sinaksian dagiti barangay officials iti panangidaulo ni Barangay Chairman Oscar B. Locquiao ti pannakainbentario dagiti nakumpiska nga items.

Naipamediko legal dagiti suspek sada naipan iti police station para iti dokumentasion ken umisu a disposision.

Iti kaudian a damag, naiyendorson ti kaso a panagsalungasing iti Section 11, 12, ken 15 ti RA 9165 maikontra kada Bajet ken Cuaresma iti opisina ti provincial prosecutor, Candon City ket nai-docket daytoy iti babaen ti NPS No. I-03-INQ-17A-0004. (Tawid News Team)