2 ‘malalaki’, tiniliw dagiti polis

VIGAN CITY – Malalaki kuno dagitoy dua a lalaki ngem saanda a nakaresistir idi tiniliw ida dagiti polis iti nagsina nga insidente a napasamak iti Barangay 4 ditoy siudad idi rabii ti Enero 27 ken iti Barangay Padu Chico, Sto. Domingo idi rabii ti Enero 24.

Malaksid dayta, nakasuanda pay iti grave threat a posible a pakaikulonganda.

Inaresto dagiti polis ni Wilson Galinda y Baptista, 24, baro, aglaklako, natibo iti Barangay Malayep, Gerona, Tarlac City ken aggigian iti Barangay Capangpangan ken maysa a Randy Tabuso, kalpasan a naireport dagitoy a nangbutbuteng ken adda pay ikutda a paltog.

Nagresponde dagiti polis-Vigan apaman a naawatda ti pulong manipud kadagiti aglaklako iti pagkarnabalan a masarakan iti Barangay 4 a maysa a lalaki ti mangbutbuteng ken adda armasna.

Iti panagimbestiga dagiti polis, agpatpatang da Darwin Ayson y Galace, 40, naasawaan, tricycle driver ken residente iti Barangay 4, ken ni Eric Cabigon Alconis, 30, naasawaan, barangay tanod, ken agnaed met laeng iti nadakamat a barangay, idi kellaat lattan nga immasideg ni Galinda, inuksotna ti paltogna a cal. 38 sana kinuna: “uray sino ditoy Vigan, awan kabuteng ko”.

Gapu iti daytoy, immadayo ni Ayson. Ngem idi nagsubli, inruar manen ti suspek ti paltogna, pinaturonganna ti biktima sana kinuna: “nia problemam brad? awan kabuteng ko, adu kabagyak ditoy Vigan”.

Mapapati nga imparang pay ti suspek ti paltogna kadagiti stall owners iti bargain area ken dagiti aggatgatang a nagbutngan dagitoy ket inreportdati insidente iti polis.

Naipilan ti kaso a grave threat maikontra ken ni Galinda iti City Prosecutor’s Office, Vigan City.

Saan a narekobre ti paltog a pinagkarkarit ti suspek.

Kabayatanna, napan la gimmatang iti agas ni Mark Kiven Rubianes y Balbin, 16, baro, out of school youth ken residente iti Barangay Cabaritan, Sto. Domingo ngem kinabil ken binutbuteng daytoy sabali pay a malalaki.

Iti report manipud iti polis ti Sto. Domingo, nakasakay iti Honda TMX a motorsiklona, napan ni Rubianes iti Barangay Padu Chico tapno gumatang iti agas idi agarup 9:17 ti rabii ti Enero 24 idi pinara ni Tabuso sana innala ti tulbek ti luganna.

Mapapati a binekkel pay ni Tabuso ni Rubianes sana kinuna iti Ilokano: “Am-ammo nak padasem ti agayab ti kakabsat mo ta pumatayak ditoyen”.

Inuksot kano pay ti suspek ti paltogna, segun iti report.#