2 minero natay, 1 nasugatan iti landslide

TUBA, Benguet – Dua a minero ti natay idinto a nasugatan ti kaduada iti landslide iti parbangon ti Hulio 21 iti nagkampuanda iti Barangay Kias, ditoy nga ili

Nainaganan dagiti natay a da Alvin Sabbang ken Cesar Panganiban, agpada a taga-Aurora, idinto a nasugatan ni Orly Aglibut, 17.

Maag-agasan ni Aglibut iti Baguio General Hospital a nakaitarayanna kalpasan ti landslide.

Segun iti report, adda dagiti tallo a minero iti uneg ti kampoda nga asideg iti maysa a tunnel idi nagreggaay ti daga ket nagaburanda.

Immarayat dagiti padada a minero ket naisalakanda ni Aglibut.

Awanen ti biag dagiti dua idi maalut-ot ida dagiti immarayat a fire officials.

Mapapati a ti napigsa a tudo ti nangpalukneng iti daga a puon ti nagreggaayanna, segun iti maysa a fire official.

Segun iti maysa nga opisial ti Mines and Geosciences Bureau (MGB) iti Cordillera, mapapati nga awan ti permit dagiti natay a minero.

Ngem kinuna dagiti kabagian dagiti pimmusay a dida patien nga awan ti permit dagitoy nga agminas.

Mapattapatta nga adda aganay a 100 a minero nga agminminas iti asideg iti nakapasamakan ti landslide.

Kinuna ti maysa a city official a masansan nga adda landslide iti nasao a lugar no matutudo ket aggawid dagiti minero. Ngem gapu iti panaginitna idi Hulio 20, mapapati nga inkeddeng dagiti tallo ti agtalinaed iti kampoda.#