2 natay, 1 nasugatan iti nagsina a pammaltog

CERVANTES, Ilocos Sur – Naipupok ti maysa a barangay kagawad gapu iti mapapati nga aksidente a pannakapaltogna iti dua a menor de edad a nakatayan ti maysa iti Barangay San Juan ditoy nga ili iti alas siete y media ti rabii ti Oktubre 24.

Iti report manipud iti polis ditoy nga ili, aksidente a napaltogan ni Nazareno Realin y Padiyeng, 39, naasawaan, kagawad ti barangay San Juan, da Amelito Echalas y Bistayen, 16, baro, high school student ken Manilyn Realina y Lizardo, 13, Grade V, agpada a residente iti nadakamat a barangay.

Naitaray dagiti biktima iti Bessang Pass Memorial Hospital ngem naideklara nga awanen ti biag ni Echalas gapu iti sugatna iti ulo ken barukongna. Nasugatan ni Realin iti makannawan a luppona.

Segun iti report, nagsubang da Macmac Realin ken Eddie Tutates bayat ti panaginomda iti balay ti kagawad ket idi saan a makaanawa ti suspetsa, innalana ti 12-gauge backshotna ngem mapapati nga aksidente a nakalbitna ket napuntaan dagiti dua a menor de edad.

Kabayatanna, maysa a lalaki ti pinapatay ti dua a lalaki a nakasakay iti motorsiklo iti Barangay Balaleng Laudenia, Bantay, Ilocos Sur iti alas nuebe beinte ti bigat ti Oktubre 28.

Maibasar iti inisial a report dagiti polis-Bantay, pampanurnoren ni Alfredo Pablo y Ragucera, 59, naasawaan, residente iti nadakamat a barangay, ti barangay road nga agpaamianan idi sarunuen dagiti suspetsa a nakalugan iti maris-nangisit a motorsiklo a Honda Wave nga awanan iti plaka ket pinaltopaltoganda ti biktima.

Nagsagrap ti biktima iti uppat a sugat iti likudna, dua iti bakrangna ken maysa iti abagana ket pimmusay bayat ti pannakatamingna iti Metro Vigan Cooperative Hospital a nakaitarayanna.

Nakarekobre dagiti polis iti walo a kapsula ken maysa a buli a nagtaud iti cal. 45 iti nakapasamakan ti krimen.

Awan pay ti maitudo a suspetsa ken no ania ti motibo iti pammapatay.#