Footer

2 search operations, nagpositibo; 2 nakasuan panaglabsing RA 10591

CABUGAO, Ilocos Sur – Naipaiman iti provincial prosecutor’s office ti kaso a panaglabsing iti RA 10591 maikontra iti dua a lumugar iti Barangay Catucdaan ditoy nga ili a nakakumpiskaan dagiti polis kadagiti paltog ken balbala iti inwayatda a search operation itay nabiit.

Positibo ti panagsukisok dagiti polis-Cabugao idi agsapa ti Pebrero 27 iti balay da Virgilio Seguritan Sarte ken James Siruno Sarte aka Jinky, agpada nga agnaed iti Barangay Catucdaan babaen ti bileg ti Search Warrants No. 004 S2017 ken 005 S2017 nga inyisio ni Judge Raphiel F. Alzate ti Regional Trial Court, Branch 24, Cabugao.

Nakumpiska dagiti polis iti balay ni Virgilio ti maysa nga M1 carbine rifle (Cal .30) nga addaan magazine a naglaon iti 11 a bala; maysa a bassit a pouch a naglaon iti 8 a bala para iti Cal. 30 (M1 carbine rifle); ken maysa a plastic bag pack (kalupi) a naglaon iti magazine para M1 carbine rifle (Cal. 30) nga addaan 10 a bala ken 3 a bala para Cal. .38.

Nakumpiska met iti balay ni James ti maysa a homemade caliber .38 nga addaan 5 a bala a naisuksok iti chamberna; ken maysa a converted cal. .22 (air gun).

Naimbentario dagiti nasamsam a paltog ken balbala iti imatang dagiti barangay officials a pakaibilangan da Kagawad Felicitas B. Sudaria, Kagawad Wilmer P. Penis, Kagawad Loberto Ramos ken Kagawad Floro Penis sada naipaima iti Crime Laboratory office, Ilocos Sur PPO, Bantay, Ilocos Sur para iti ballistics examination.

Naikustodia dagiti suspek iti police station ditoy para iti naan-anay nga inbestigasion, dokumentasion ken disposision. (Tawid News)