Footer

2 most wanted person, nanabtuog iti nagsina a manhunt operation

VIGAN CITY – Dua nga akusado iti krimen ti nanabtuog iti nagsina a manhunt operation nga insayangkat ti nagtitipon nga elemento ti kapolisan idi agsapa ti umuna nga aldaw daytoy a bulan.

Babaen ti bileg ti warrant of arrest nga inyisio ni Judge Corpuz B. Alzate ti Regional Trial Court, Branch 21, Vigan City, nangiwayat ti nagtitipon nga elemento ti CIDG Ilocos Sur, PIB Ilocos Sur, Ilocos Sur PPSC, Maritime, PDEA ken Vigan City police station iti manhunt operation idi alas 6:00 ti agsapa ti Marso 1 sadiay Barangay Purok-a-Bassit ditoy siudad a nagresulta iti pannakaaresto ni Rhanie Paa y Riveta, 36, balo, mangngalap.

Akusado ni Paa iti frustrated murder ket nairekomenda nga agpiansa iti P120,000.00 para iti temporario a pannakawayawayana.

Nakalista ni Paa a No. 10 most wanted person iti city level ken karaman iti regional target list ti PDEA-1.

Kas maibatay iti Information Report ti CIDG a napetsaan October 15, 2015, ni Paa ti dadaulo ti Paa-Favis Group a mapapati nga agisaysayangkat iti illegal drug trade ken gun-for-hire activities.

Naipan ni Paa iti opisina ti CIDG Ilocos Sur para iti dokumentasion ken disposision.

Kabayatanna, maysa pay a wanted person ti inaresto ti nagtitipon nga elemento ti CIDG Ilocos Norte, PIB ISPPO, PIB INPPO ken SINAIT Police Station babaen ti sabali pay a manhunt operation nga insayangkatda sadiay Barangay Teppeng, Sinait, Ilocos Sur.

Imet dagiti operatiba ti warrant of arrest nga inyisio ni Judge Francisco Quilala ti RTC Branch 18, Batac City, Ilocos Norte idi inwayatda ti manhunt operation maikontra ken ni Handley Tapuro y Ines, aka “Belleng”, 32, awanan asawana, ken residente iti nadakamat a barangay.

Sumangsango ni Tapuro iti kaso a murder ket saan a makapagpiansa para iti temporario a wayawayana.

Nakalista ni Tapuro a No. 1 most wanted person iti municipal level ken miembro ti Yadao Group, grupo ti mapapati a gun for hire nga agiwaywayat kadagiti pammapatay iti Ilocos Sur, Ilocos Norte ken Cagayan.

Naipan ni Tapuro iti Ilocos Norte CIDG office para iti dokumentasion sakbay a naipaima iti korte a nakaisaklanganna. (Tawid News)