2,100 ektaria a pinagayan dinidigra ni Bagyo Pepeng iti Cabugao

CABUGAO, Ilocos Sur – Aganay 2,100 manipud iti 2,275 nga ektaria a namulaan iti pagay ti naapektaran idinto a 30% ditoy ti grabe a nadadael gapu iti panangbasnot ni Bagyo Pepeng, daytoy ti impadamag ni Mayor Dio Caesar S. Suero bayat ti eksklusibo nga interbio ti NBN Vigan kenkuana itay nabiit.

Segun iti mayor, manipud iti P2 milion calamity fund ti ili, nangilatang ti gobierno munisipal iti P200,000 tapno matulongan ti sektor agrikultura; P500,000 iti rehabilitasion ti inprastruktura; P100,000 para iti agas; P300,000 para iti pannakasimpa ti nadadael a paset ti munisipio, food court ken tiendaan; P400,000 para iti narba a rangtay ti Namruangan idinto a naitulong kadagiti barangay ti nabati a pondo.

Amin a nadadaelan iti balay, napukawan iti alikamen, mula ken dingo ket maikkan iti tulong pinansial kas wagas ti LGU a tumulong iti panangrugida manen,” kinuna ni Suero.

Nakaro a naapektaran ti Barangay Catucdaan, Maradodon, Carusipan ken Cacadiran a napunas ti kalsadana gapu iti napegges a danum a nagayus manipud iti bantay.

Kinuna ti mayor nga agkurang ti walo a bulan tapno makaaramidda iti baro a dalan ket dinawatna ti itutulong ti gobierno probinsial ken ti national government tapno mapaadda met laeng ti dalan a kumamang kadagiti nadakamat a barangay.

Bayat ti bagyo, umabot iti 6,000 a pamilia ti nayawatan iti relief goods itoy nga ili babaen ti inisiatibo ti LGU ditoy, gobierno probinsial ken ti opisina ni Dip. Ronald Singson.

Mainaig itoy, 600 a mannalon ditoy ti immawat iti pinansial a tulong ken subsidy iti agduduma a bukel idi Oktubre 17.#