24 tattao natay, 27 nasugatan iti panangduprak ni Bagyo Emong iti Pangasinan, La Union: RDCC1 report

SAN FERNANDO CITY – Agdagup iti 24 a tattao ti natay ken 27 dagiti nasugatan iti panangsanut ni Bagyo Emong iti Pangasinan ken La Union, daytoy ti nakumpirmaran iti report ti Regional Disaster Coordinating Council 1 bayat ti panangbisita itay nabiit ni Police Chief Supt. Ramon V. Gatan, PRO1 Regional Director ken chairman ti RDCC1 kadagiti lugar a dinidigra ti bagyo.

Simmangpet ni Bagyo Emong iti Region I idi Mayo 7 ket pimmanaw met laeng iti kabigatanna ngem adu a sanikua ti dinadaelna ken adu a tattao ti natay ken nasugatan nangruna iti ili ti Bani, Anda, Bolinao ken Alaminos City iti Pangasinan ken Bauang ken Aringay iti La Union, kinuna ti report.

Kaadduan kadagiti natay ken nasugatan maigapu kadagiti falling debris ken timmayab nga atep a sim.

Kumpirmado a 21 ti natay ken 25 ti nasugsugatan iti bagyo iti Pangasinan idinto a 3 ti natay ken 2 ti nasugatan iti La Union..

Agdagup iti 4,859 dagiti balbalay a totally damaged idinto a 10,175 a balbalay ti partial a nadadael iti Pangasinan a nakaapektaran ti 114 a barangay ken 18,380 a pamilia; idinto nga iti La Union, agdagup iti 1,178 dagiti kabalbalayan ti naan-anay a naduprak ken 6,920 dagiti partial a nadadael a nakaapektaran iti 158 a barangay ken 8,902 a pamilia.

Bayat ti panagbisitana, personal a kinita ni Gatan ti pannakaideliber dagiti sinako a bagas ken dadduma pay a relief goods kadagiti munisipalidad ti Anda, Bana ken Bolinao, tallo kadagiti kakaruan a dinidigra ni Bagyo Emong ken nakikonsulta kadagiti mamayor dagitoy nga ili.

Nakikoordinar pay ti RDCC1 chairman mainaig iti pannakaisayangkat dagiti search and rescue operations, clearing operations, damage assessment ken dadduma pay nga aktibidad a nakipartisiparan ti Naval Force Northern Luzon, Philippine Army, Philippine Coast Guard, Office of the Civil Defense, DSWD ken dadduma pay a maseknan nga ahensia.#