3 natay, 8 nasugsugatan nagsisina nga aksidente

STA. LUCIA, Ilocos Sur – Tallo ti natay idinto a walo ti nasugsugatan iti nagsisina nga aksidente iti lugan iti tallo nga ili itay nabiit.

Iti aksidente ditoy nga ili, natay ti drayber ti maysa a 10-wheeler ken nasugatan dagiti dua a kaduana idi maidungpar ti luganda iti maysa a bodega iti Barangay Angkileng ditoy.

Natay ni Ariel Almariego, residente iti Calagbagangan, Sipocot, Camarines Sur ken nasugatan dagiti helpers a da Jeffrey Fermin ken Rogelio Mengorio, agpada nga agnaed iti Santo Tomas, Batangas.

Segun iti report, bimtak ti akinkannawan a sango a pilid ti lugan ket dinungparna ti bodega iti igid ti kalsada.

Naitaray dagiti biktima iti Candon City Hospital ngem natay ti drayber.

Iti met aksidente iti zigzag road iti Banaoang a sakup ti Santa, Ilocos Sur, natay ni Eric Coloma, agnaed iti San Nicolas, Ilocos Norte, empleado ti Land Transportation Office, Batac, Ilocos Norte idinto a nasugsugatan ti drayber ti delivery truck a ni Junel Butay, 38, agnaed iti Batac, Ilocos Norte ken dua a pahinante.

Segun iti report, napukaw ti kontrol ti drayber iti manibela ket naidungpar ti lugan iti bakras ti bantay iti zigzag road.

Kabayatanna, maysa ti natay idinto a tallo ti nasugatan iti panagdinnungpar ti maysa traysikel ken maysa a lugan iti highway a sakup ti Barangay San Basilio, Magsingal, Ilocos Sur.

Natay ni Jerry Dolores, 32, naasawaan, drayber iti traysikel, taga-Patong ditoy nga ili idinto a nasugsugatan da Roderick Dolores, Anacleto Barcante ken Dante dela Cruz, dagiti nakalugan iti traysikel, agpapada a taga-Patong ditoy nga ili idi nakidinnungpar ti luganda iti maysa a Fuzo tanker a minaneho ni Rodolfo Flores, 46, taga-San Agustin, San Fernando, La Union.

Segun iti report, mapapati a manipud iti intersection iti sango ti tiendaan, nagderetso ti traysikel a bimmallasiw iti kalsada a puon ti nakadungparan kenkuana ti Fuzo tanker.

Naitaray dagiti nasugatan iti Magsingal District Hospital sa naiyalis ni Jerry Dolores iti sabali nga ospital ngem natay bayat ti pannakatamingna.#