3 rebelde simmuko ti La Union

SAN FERNANDO CITY – Tallo a simmuko a kameng ti New People’s Army ti naipresenta iti hepe ti PNP ditoy idi bimmisita ditoy itay nabiit.

Naipresenta da Rona Marena-Morales, alias Ka Aga ken Kumander Maya, dadaulo ti Samahang Yunit Pangpulitika; Cris Morales alias Ka Alibangbang; ken Ricarde Dispe alias Ka Pretty, agpada a kameng ti SYP iti babaen ni Ka Maya ken ni PNP Chief Director General Jesus Verzosa ken ni Gov. Manuel Ortega sakbay ti panagpinnirma iti nagtipon a deklarasion ti La Union a kas insurgency-free province itay Septiembre 4 kas paset ti pannakaselebrar ti Crime Prevention Week a naangay ditoy siudad idi Septiembre 4.

Segun ken ni La Union PNP Provincial Director Senior Supt. Noli Talino, naikappon dagiti tallo iti NPA iti Northern Samar ngem nagpaknida ditoy sada simmuko iti polis.

Kinuna ni Talino a di kinayat dagiti tallo ti simmuko kadagiti autoridad iti Northern Samar agsipud ta nagbutengda a papatayen ida dagiti kakaduada.

Kinuna ni Talino a naggian dagiti tallo iti Antipolo, Rizal ket panggepda ti sumuko ngem nagbabawida.

Nagpakni dagiti tallo iti Agoo, La Union sada immalis idi napan a bulan iti San Juan, La Union.

Kalpasan nga imparipiripda ti isusukoda, rinugian ti provincial police office ken dagiti lokal a polis ti nakinegosiar kadakuada a nagresulta iti isusukoda.

Segun ken ni Talino, inkeddeng dagiti tallo ti isusukoda gapu iti rigat ti panagbiag iti kabambantayan.#