3 tattao, biktima iti nagsisina a pammaltog

BANTAY, Ilocos Sur – Tallo a nagsisina a pammaltog ti naisayangkat ditoy probinsia a nakatayan ti dua ken nakayospitalan ti maysa.

Pinaltogan ti armado a tattao a nakalugan iti motorsiklo ti maysa a baro idi rabii ti Mayo 25 iti Zone 4 ditoy nga ili.

Pimmusay ni Joel Albert Alonzo y Raqueno, 24, baro, agnaed iti nadakamat a barangay bayat ti pannakaagasna iti Metro Vigan Cooperative Hospital a nakaitarayanna.

Segun iti report, makipatpatang ni Alonzo iti maysa nga am-ammona idi nagsardeng iti batogda ti motorsiklo a nagluganan dagiti suspetsa ket maysa kadagitoy ti nangpaltog iti biktima.

Mapapati a cal. 45 ti naaramat dagiti di pay nabigbig a suspetsa.

Maysa a babai a mangngilot ti napapatay iti uneg ti pagtaenganna iti Barangay Nagsingcaoan, Galimuyod, Ilocos Sur idi rabii ti Mayo 24.

Nagsagrap ni Arsenio Buagayan, 48, naasawaan, agnaed iti nasao a barangay iti sugat iti ulo ken bagina a puon ti nakatayanna.

Segun iti report, mapapati nga adda naala dagiti polis a surat a mangibagbaga a napaidam ken naagum ti biktima.

Nakasarak dagiti polis iti tallo a kapsula ti kal. 45 iti nakapasamakan iti krimen.

Di pay nabigbig ti nangisayangkat iti pammaltog.

Kabayatanna, maysa a maestra ti pinaltogan dagiti saan pay nga am-ammo a tattao idi agarup 8:45 ti rabii ti Mayo 25 iti Barangay Ayusan Norte ditoy.

Iti baet ti sugatna iti sellangna, naitaray ni Rosario Alconi, 58, naasawaan, agnaed iti nadakamat a barangay, maestra iti University of Northern Philippines, ti bagina iti ospital.

Segun iti report, napan kinita ti biktima ti garaheda idi makangeg iti kanalpaak ket di metten a napaltogan.

Nakasarak dagiti polis kadagiti kapsula iti nakapasamakan ti pammaltog.

Taktakuaten pay dagiti inbestigador no pammutbuteng wenno panagtakaw ti motibo ti pammaltog.#