4 nagtakaw iti cellphone shop, naipilaan iti kaso

VIGAN CITY- Kinuna ti polis a nasolbaren ti kaso a panagtakaw iti maysa a cellphone shop ditoy siudad ti Vigan idi Agosto 30 kalpasan ti pannakaipila ti kaso maikontra kadagiti uppat a suspetsa.

Napilaan iti kaso da Modesto Tacud, 42, agnaed iti Shelterville, San Julian Norte, ti anakna a ni Christopher Tacud, 21, San Julian Norte, Vigan City, Jesus Encarnacion, 20, residente iti Pantay Daya, Vigan City, ken Filemon Alias, 32, maatap a nagtakaw kadagiti selpon ken dadduma pay nga aksesoria iti Masterland Computer Shop and Cellphone Accesories a masarakan iti daya ti Vigan City Public Market.

Natuntonan metten dagiti polis dagiti nasurok 30 a selpon, MP4, kamera ken accessories a natakaw iti nasao a pagtagilakuan a mapattapatta nga aggatad amin iti P 500,000.

Segun ken ni Polis Chief Inspector Maximo Taclas, hepe ti polis ditoy, maysa a dati a trabahador ti Newborn Hardware ti maatap a mastermind gapu ta isu ti nangted iti kumbinasion ti lock tapno makastrek dagiti kakaduana iti pagtagilakuan.

Maymaysa ti akinkukua iti hardware store ken ti natakawan a computer shop.

Immuna a natiliw ni Christopher Tacud iti bigat ti Septiembre 5 bayat ti panaglakona iti MP4 iti maysa a cellphone shop. Idi damo kinuna ni Tacud nga awan ti pannakainaigna iti panagtakaw iti Masterland ngem saanen a nakapaglibak idi ipakita ti polis a ti serial number ti ilaklakona ket serial number ti maysa kadagiti natakaw iti Masterland.

Mapapati nga intudo ni Tacud dagiti kakaduana ket nagsasaruno a naaresto dagitoy ken narekobre dagiti tinakawda babaen ti operasion nga inwayat dagiti polis ditoy siudad.

Ni Encarnacion ti maitudtudo a a nangited iti kumbinasion ti lock ti ridaw ti nasao a pagtagilakuan.#