4 suspek, napilaan iti kaso a pammapatay

BANTAY, Ilocos Sur -Uppat a suspek iti pannakapapatay ti maysa a residente iti Barangay Paing ditoy nga ili ti nakasuan iti murder itay nabiit.

Nakasuan iti provincial prosecutor’s office iti murder with the use of illegally possessed firearm da Jolly Madriaga y Piga, 21, baro ken dagiti tallo a kakaduana a da Rodel Raboy, Roland Masanda ken Agustin Puerto, agpapada a residente iti Sitio Piga, Barangay Tay-ac ditoy nga ili.

Tiniliw dagiti polis ditoy ni Madriaga ket boluntario nga insurenderna ti maysa a model Colt automatic cal. 45 nga addaan Serial No. 221013 karaman ti maysa nga empty magazine.

Iti pannakaisurat daytoy, birbiroken pay laeng dagiti polis da Raboy, Masanda ken Puerto.

Iti inisial nga inbestigasion dagiti polis, nakalugan iti scooter nga agdaldaliasat ni John Paul Bueno y Cortez, 24, tubo ti Barangay Namalangan, Santa, Ilocos Sur ngem agdama a residente ti Brgy. Paing, Bantay, Ilocos Sur iti rabii ti Septiembre 18, kaduana ni Marlon Javier y Cortez, 28 , iti kalsada a sakup ti Barangay Tay-ac idi dua a motorsiklo a nagluganan dagiti mapapati a suspek ti nangkamakam kadakuada sa pinaltogan ti maysa ti biktima.

Naitaray ti biktima iti Metro Vigan Cooperative Hospital ngem naideklara a dead on arrival. Mapapati a Cal. 45 ti nausar nga igam maibasar iti narekobre dagiti polis a maysa a kapsula.

Kabayatanna, dua a lalaki ti natay iti nagsina a pammaltog iti Barangay Maynganay ditoy nga ili ken iti Barangay San Rafael, San Esteban, Ilocos Sur.

Saanen a naidanon iti ospital ti biag ni Elizer Sambo, 43, naasawaan, residente iti barangay Baliw Laud, ditoy nga ili kalpasan a pinaltogan ti dua a di nabigbig a lalaki.

Iti inisial nga inbestigasion, ipupuesto ti biktima dagiti tagilakona a dry goods iti public market idi pinalikudan a paltogan dagiti suspetsa.

Kalibre .45 ti mapapati a naaramat iti pammapatay.

Iti sabali a damag, natay ni Damson Soriano, 28, residente iti sitio Loob, Bateria, Ilocos Sur gapu iti grabe a sugatna iti likudna gapuanan ti pannakapaltogna.

Naammuan iti report a madama nga aggiinom da Soriano ken dua a di nainaganan a kaduana idi adda nangpaltog iti biktima a nakatamaan ti likudna a puon ti ipapatayna.#