5 kidnapper, nagudas, biktima, naisalakan iti rescue operation nga inwayat ti polis

URDANETA CITY – Lima a mapapati a miembro ti kidnap-for-ransom gang ti nagudas iti pannakipinnaltogda kadagiti polis a nangisayangkat iti rescue operation iti kinidnapda nga agtutubo idi rabii ti Abril 19 iti Purok 4, Barangay Palina West ditoy a siudad.

Nabigbig dagiti nagudas iti shootout a da Dionisio Obillo, Army Technical Sergeant, Rosendo Matias, retired a Phil. Marine, akinkukua iti balay a nakaipaknian ti biktima, ti anakna a ni Roger Matias ken ni Marcial Fontanilla. Saan pay a nabigbig ti maikalima a nagudas.

Madama nga an-anupen dagiti polis dagiti nakalibas a kakadua dagitoy.

Mapapati a ni Obillo ti lider ti Mostrales-Obillo-Waray-Waray kidnap group a nangkidnap ken ni Julian Rodriguez, 22, negosiante, residente iti Ayala, Alabang, Muntinlupa City.

Saan a naan-ano ni Rodriguez ket nakasublin iti sidong ti pamiliana.

Kinuna ni Pangasinan Police Provincial Director Percival Barba nga insayangkat dagiti operatiba ti Police Anti-Crime Emergency Response (Pacer) ti rescue operation babaen ti koordinasion dagiti miembro iti Special Operations Group ti Pangasinan PPO iti panangidaulo ni Supt. Wilson Joseph Lopez, ti Police Provincial Intelligence Branch ken dagiti polis ti Villasis ken daytoy nga ili.

Sakbayna, kinuna ni Senior Supt. Leonardo Espina, hepe ti Pacer, a nakaala dagiti operatiba iti intelligence report nga impakni dagiti kidnapper ni Rodriguez iti Purok 4, Palinas West, Urdaneta City.

Nakarekobre dagiti polis iti dua a calibre .45 pistol ken dua a 9-mm a paltog manipud kadagiti nagudas a kidnapper.

Idi Abril 15, iti agarup alas onse ti rabii, sinerrek dagiti kidnapper ti internet shop a kukua ti pamilia ni Rodriguez iti Las Pinas City ket inkuyogda ti biktima iti panaglibasda a naglugan iti Honda Civic a kotse ti kabsat daytoy.

Mapapati a ti babai a kabsat ni Rodriguez ti puntiria nga italaw dagiti kidnapper ngem dinawat ni Julian nga isu ti alaenda a hostage.

Nasarakan dagiti inbestigador ti kotse iti Unzard Village iti Villasis, Pangasinan kalpasan ti dua nga aldaw.

Mapapati a saan a nagballigi dagiti kidnapper a nakinegosiar iti pannakasaka ni Rodriguez gapu iti saan a pannakikooperar ti pamilia ti biktima.

Maysa a biktima ti grupo ti timmulong a nangbigbig iti dua kadagiti kidnapper a nagudas iti shootout.

Mapapati a naipakni met ti nasao a biktima iti isu met laeng a balay idi nakidnap idi Enero 8 daytoy a tawen.#