Latest News: 5 lallakay, babbaket, naiserrek iti Home for the Aged | Tawid News Magazine - Weekly Ilocos News 📰

5 lallakay, babbaket, naiserrek iti Home for the Aged

MAGSINGAL, Ilocos Sur — Lima a lallakay ken babbaket dagiti umuna a naawat nga aggian iti kaluklukat a balay para nataengan ditoy nga ili.

Segun ken ni Francis Dacanay, mangimaton iti Home for the Aged, addan lima nga inisial a matartaraken iti nasao a balay dagiti indigent a lallakay ken babbaket.

Kinunana a madama pay ti screening kadagiti sumarsaruno a maiserrek ditoy a lallakay ken babbaket.

Kinuna ni Dacanay a kasapulan nga indigent ti lakay wenno baket a maiserrek iti home for the aged ken adda rekomendasion ti Municipal Social Welfare and Development Officer ti ili.

Karaman kadagiti naiserreken ditoy dagiti agssawa a Rufo Soberano, 85 ken Jovita Soberano, 75, (Pussuac, Sto. Domingo); Benedicto Guerrero, 72, ken Patricio Roldan, 85 agpada a baro (Nalasin, Sto. Domingo); ken Rolly Roque, 62 (Brgy. IV, Vigan City).

Naluktan itay Hulio 8 daytoy home for the aged a masarakan iti abay ti Magsingal District Hospital.

Segun ken ni Dacanay, addaan ti home for the aged iti kapasidad a 15, ken sungbatan ti gobierno probinsial amin dagiti kasapulan dagiti babbaket ken lallakay nga aggian ditoy kas iti kawesda, taraon, bitamina, agas ken matarakenda babaen kadagiti nurses ken caregivers.

Innayon ni Dacanay a no adda agsagubanit kadakuada, sidadaan ti district hospital iti abay ti pasdek a mangakomodar kadakuada.

Kinuna ni Gov. Deogracias Victor Savellano a sagut ti gobierno probinsial daytoy kadagiti lolo ken lola a saan a maas-asikaso gapu iti kaawanen ti pamiliada wenno gapu iti kinakurapay.

“No makitatayo a kasapulan nga idakdakkel ti pasdek, aramidentayo tapno adu ti maakomodartayo ken ad-adu met ti matulongantayo a nataengan” kinuna ti gobernador.#