Footer

500 student-journalists, dimmalan iti seminar-workshop

VIGAN CITY – Indagadag ti desk editor ti maysa a nailian a pagiwarnak a kasapulan a dagiti masurat a damag ket adda pategna ken saan a pangpapogi laeng tapno adda gundawayna a maipablaak.

“…masapul a dagiti press releases a suratentayo ket newsworthy a saan a papogi laeng tapno adda gundawayna a maipablaak,” kinuna ni Ester Dimasupuil, desk editor ti Philippine Daily Inquirer iti sanguanan dagiti aganay 500 a campus journalists ken school paper advisers manipud iti nagduduma a pagadalan elementaria, sekundaria ken kolehio iti Ilocos Sur a timmabuno iti maysa nga aldaw a journalism seminar and workshop nga inesponsoran ti gobierno probinsial itay Hulio 6.

Ni Dimasupil ti kangrunaan a lecturer iti nasao a panagsanay a naangay babaen ti initiatibo ti gobierno probinsial tapno maasa dagiti estudiante ken dagiti kameng ti lokal a media iti panagipresentar kadagiti impormasion a kasapulan iti panagsuratda iti damag.

“Babaen itoy a journalism seminar, mangnamnamaak a sumayaat pay ti panangipakat dagiti journalists iti makunkuna a responsible journalism iti lokalidadtayo,” kinuna ni Savellano.

Karaman kadagiti naisuro ditoy ti panagsurat iti epektibo a press releases, basic news writing, innovations in writing ken panangliklik kadagiti balikas a kaaduan a pagbiddutan uray pay dagiti beteranon nga agiwarwarnak.

Kinuna ni Dimasupil a nupay mapukpukawen ti karisma ti warnakan kadagiti umili gapu iti kaaddan ti radio ken telebision ken iti internet a nadardaras a wagas a pangalaan iti impormasion, rumbeng laeng a saan a lipaten ti agbasa iti pagiwarnak.

Sinaludaran pay ti editor dagiti kameng ti lokal a media nga immatendar iti panagsanay. Kinunana nga agtultuloy a proseso ti panagsursuro ket uray dagiti bangolan nga agiwarwarnak, kasapulan a dumalanda kadagiti seminar ken workshop.#