Footer

7 aglaklako iti nalaka a fuel, oil, nanabtuog iti entrapment operations

BAGUIO CITY – Pito a tattao ti inaresto dagiti operatiba ti National Bureau of Investigation gapu iti illegal a panaglakoda iti fuel ken oil ditoy siudad.

Naaresto ken naibalud dda Florante Astudillo, Donald Alabat, Marvin Alcedo, Ramon Bulagsay, John Garibican, Johhny Garibican, Joan Imadoa ken Labenio Ducog kalpasan dagiti insayangkat dagiti operatibo ti NBI a nagsasaruno nga entrapment operations maikontra kadakuada.

Sakbayna, nagreklamo dagiti sumagmamano a negosiante ditoy siudad a kemeng ti Business Oil Firms of Baguio City ken ni NBI-Cordillera Regional Director Ricardo Pangan, Jr. mainaig iti panagideliber ken panaglako dagiti “dakes a tattao wenno pribado a manglimlimo a kompania”iti nalaka a presio ti fuel ken oil iti igid ti kalkalsada ti siudad kadagiti motorista ken addaan sasakayan.

Iti surat dagitoyken ni Pangan a napetsaan iti Pebrero 24, impulong dagiti negosiante, agsardeng lattan dagiti truck iti igid ti kalsada ket lakuanda dagiti motorista ken addaan lugan iti fuel ken oil a naikarga kadagiti dram wenno babaen dagiti delivery trucks nga addaan iti pagbomba a maideretso iti tangke dagiti sasakayan.

Adayo nga amang a nalaklaka ti presio ti lakoda a fuel ken lana ngem iti presio kadagiti paggasolinaan a pakaigapuan iti basbassit a paglakuanda, segun ti pulong dagiti negosiante.

Kinuna pay dagiti negosiante nga idinto nga agbaybayadda iti buis ken business permits, upa ken dadduma pay a lisensia, saan a kabaelan ti makibalubal kadagiti illegal nga agideldeliber iti nalaklaka a fuel ken oil.

Segun dagiti negosiante, sinalungasing dagitoy agipuspuslit nga aglako ti probiso ti Republic Act 8479 or the Downstream Oil Industry Regulation Act of 1998 ken Batas Pambansa 33, nga inamendaran ti Presidential Decree 1865 a mangiparit iti illegal a panaglako iti petroleo ken/wenno produkto a petroleo, panagillemmeng kadagiti produkto petroleo, pananglaok ken under delivery… ken dadduma pay a pertinente a probiso a nailanad iti nasao a linteg.#