7 nasugatan iti nagsisina nga aksidente

CANDON CITY – Nagsasaruno itay nabiit dagiti aksidente iti maikadua a distrito a nakasugatan ti pito a tattao a pakairamanan ti dua a polis.

Nakapilid iti bato iti kalsada a sakup ti Barangay Darapidap ditoy a siudad ti motorsiklo a nagluganan da PO1 Gil Andaya residente iti Farola, Tagudin, Ilocos Sur ken ni PO1 Reggie Baling-oay, residente iti Poblacion Norte, Lidlidda Ilocos Sur, agpada a field training personnel ti Candon PNP a puon ti pannakaikras ti luganda iti kataltalonan.

Naitaray dagiti dua iti ospital.

Naikras met ni Adrian Diga, residente iti Sta. Maria, Ilocos Sur, idi nadalanan ti luganna dagiti bilag a mais iti igid ti kalsada a sakup ti Barangay Maynganay, Sta. Maria, Ilocos Sur ket nayospital iti Reyes Clinic and Hospital.

Mapapati nga awan ti naikabil a ballaag iti sakbay dagiti bilag a mais.

Iti sabali a damag, dinungpar ti motorsiklo a nagluganan da Leo Galanta, residente iti Barangay Paras, ditoy siudad ken ni Christian Galace, residente iti Balidbid, Salcedo, Ilocos Sur ni Dante Cottong, 24, residente iti Malibcong, Salcedo, Ilocos Sur bayat ti ibaballasiw daytoy iti kalsada.

Naitaray dagiti tallo iti Candon City para iti pannakataming ti sugatda.

Kabayatanna, nagdinnungpar ti maysa a traysikel a minaneho ni Rodolfo Hadap, 26, residente iti Paoc Sur, Sta. Lucia, Ilocos Sur ken ti motorsiklo a minaneho ni Pedrito Pacis, 52, residente iti Poblacion Sur, Sta. Cruz, Ilocos Sur iti kalsada a sakup ti Barangay Gabor Norte, Sta. Cruz, Ilocos Sur a nakasugatan ti drayber ti motorsiklo.

Napasamak ti aksidente idi sumrek ti bikathon iti panangidaulo ni Pacis a nakalugan iti motorsiklo kalsada ti Gabor Norte.#