750 nga ubbing nabenepisiaran iti Operation Kugit

VIGAN CITY – Agdagup iti 750 nga ubbing ti libre a nakugit itay Mayo 18 ditoy iti babaen ti Operation Kugit a nagbuligan nga insayangkat ti JCS-DWRS.

Daytoy ti damo a gundaway nga agbulig iti kastoy a gannuat ti nasao nga estasion ken ti JCS a programa ti salun-at ni Vice Gov. Jerry Singson.

Kinuna ni Singson a maragsakan iti kaadu dagiti nagpakugit.

Naikkan iti libre nga antibiotics dagiti nakugit nga ubbing.

Kabayatanna, nakugit a libre ti sumurok kumurang 400 nga ubbing ken babbarito manipud iti agduduma nga ili iti Operation Kugit a nagkinnammayetan ti gobierno probinsial ken ti Ilocos Sur Medical Society. Naangay ti operasion iti mismo nga opisina ti gobernador idi Mayo 17.

Segun ken ni Gov. Deogracias Victor “DV” Savellano, maysa daytoy a proyekto para kadagiti ubbing a lallaki ita a kalgaw.

“Napanunottayo daytoy ta umadani manen ti klase ket ita ti kasayaatan a panagkugit dagiti annaktayo” kinuna ti gobernador.

Malaksid a libre ti pannakakugit dagitoy, naipaayanda iti libre a pain reliever ken antibiotics para iti nadardaras a pannakaimbag ti sugatda.

Adu met a nagannak ti naragsakan itoy a proyekto ti gobierno probinsial ken Ilocos Sur Medical Society ta dakkel ti nalibre kadakuada. Umabot iti P1,800 ti pagbayad iti panagpakugit iti ospital malaksid pay iti agas a gatangen.

Inwaragawag ni Savellano a dagiti agsagsagaba iti angkit ti tamingen dagiti kameng ti ISMS iti panagtapos ti Mayo.#