Achievers, binigbig ti gobierno probinsial

VIGAN CITY – Kas panangbigbig ti gobierno probinsial kadagiti atleta ken indibidual a nakaited iti dayaw iti Ilocos Sur kadagiti pasalip iti pagilian ken ballasiw-taaw, naikkan dagitoy iti plake ti pammigbig ken cash incentives iti maysa a programa a naangay iti provincial capitol idi Hulio 9.

Mismo a ni Gov. Deogracias Victor Savellano, Vice Gov. Jerry Singson, SP Member Jose Bonoan Jr. ken SPM Gerry Lahoz ti nangiyawat kadagiti insentibo kadagiti atleta.

Karaman kadagiti napadayawan da Daniel John Lemi ti Vigan, Hemima Valdez ti Narvacan ken Generose Razo ti Candon City (chess); Hilbert Habon, ti Sta. Lucia, Bill Portido ti Gregorio del Pilar, Realyn Pascua ti Candon City, Jonel Gallego ti Candon City ken Joseph Velasco ti Bantay (athletics); Rose Jean Lodivico ti Santiago (taekwondo); Jeremiah Vallente ti Sta. Catalina (International Junior Science Olympiad); Jacob Ivan Dumbrique ti Vigan (Wizard in Mathematics International Competition) ken Romeo Lanuza (Disaster Response Hero/Gawad KALASAG 2007).

Iti panangkablaaw ti gobernador kadagiti achievers, kinunana a “masapul a mangrugin ti panagsanay iti atleta no ubing pay” ket “masapul a manipud iti rugi, tulongantayo ida a masapa a saan ket a satayto la ida pansinen no nakaiteddan iti dayaw para iti probinsia.”

Mainaig itoy, naangay ti Speed Agility and Fitness Training iti Quirino Stadium idi Hulio 9-10 nga inatenderan ti aganay 400 a trainors ken coaches manipud nagduduma a pagadalan iti probinsia.#